Qazaqstan paıdalanylmaı jatqan gazdy tsıfrlyq maınıngke qoldanbaq
ASTANA. KAZINFORM – Qazaqstanda tsıfrlyq maınıngke munaı ken oryndarynda paıdalanylmaı jatqan ilespe munaı men tabıǵı gazdy paıdalaný josparlanyp otyr. Bul týraly Premer-mınıstrdiń orynbasary – jasandy ıntellekt jáne tsıfrlyq damý mınıstri Jaslan Mádıev málimdedi.
Onyń aıtýynsha, qazir Qazaqstanda maınıngpen aınalysýǵa lıtsenzııa alǵan 75 maınıng kompanııasy jumys isteıdi, al olardyń paıdalanatyn 500 myńǵa jýyq maınıng qurylǵysy memlekettik tizilimge tirkelgen.
– Tsıfrlyq maınıngke munaı ken oryndaryndaǵy qazirgi gazben jabdyqtaý júıesinde paıdalanylmaı jatqan ilespe munaı jáne tabıǵı gazdy paıdalaný kózdelip otyr. Bul gazdan elektr energııasy óndirilip, tsıfrlyq maınıngke jumsalady. Bul rette eldiń biryńǵaı elektr energetıkalyq júıesine qosymsha júkteme túspeıdi, - dedi Jaslan Madıev.
Tıisti zań jobasy 2027 jylǵy 1 naýryzǵa deıin Quryltaı qaraýyna engizý josparlanyp otyr.
Jaslan Mádıevtiń sózinshe, bul sheshim búginde kádege aspaı jatqan gazdy elektr energııasyna aınaldyryp, ınvestıtsııa tartýǵa jáne munaı óndiretin óńirlerde jańa jumys oryndaryn ashýǵa múmkindik beredi.
Aıta keteıik, Qazaqstanda tsıfrlyq aktıvterdi erikti túrde jarııa etý tetigi engiziledi.
