Qazaqstan pasporty álemdik reıtıngte 67-oryn aldy
NUR-SULTAN. QazAqparat – Qazaqstan pasporty 2020 jylǵy Henley Passport Index nemese saıahat úshin yńǵaıly tólqujattar reıtınginde 199 eldiń arasynda 67-orynǵa ornalasty. Bul týraly Henley & Partners konsaltıngtik kompanııasy seısenbi kúni jarııalaǵan málimette aıtylǵan, dep habarlaıdy QazAqparat.
Henley Passport Index reıtıngi Halyqaralyq áýe kóligi qaýymdastyǵynyń (IATA) eksklıýzıvti málimetterine negizdelgen jáne 199 eldiń tólqujaty men 227 týrıstik baǵytty qamtıdy. Jáne kez kelgen elde vızalyq saıasattyń ózgertilýine baılanysty jyl boıy jańartylyp otyrady.
2020 jylǵy Henley Passport Index reıtınginde vızasyz qatynaýǵa bolatyn ár memleket úshin 1 baldan berilgen. Qazaqstan tólqujaty álem elderi men aımaqtarǵa vızasyz barý boıynsha 76 ball jınap, 67-orynǵa turaqtady. ıAǵnı, elimiz azamattary 76 elge vızasyz qatynaı alady.
Kósh basynda – Japonııa. Kúnshyǵys eli tólqujatynda 191 upaı bar, ol úshinshi jyl qatarynan birinshi oryn alyp otyr. Sıngapýr pasporty 190 upaımen – ekinshi orynda, al Ońtústik Koreıa men Germanııa 189 upaımen – úshinshi pozıtsııada.
Reseı tólqujaty 118 upaımen 51-satyǵa ornalassa, 71 elge vızasyz kirý (nemese kelý boıynsha vıza) múmkindigin jasaǵan Qytaı barlyq elder arasynda 72-shi orynda tur.
Budan bólek, Belarýs 68-inshi, Ázerbaıjan - 76, Qyrǵyzstan - 80, Armenııa - 81, Tájikstan - 84, Ózbekstan - 85 jáne Túrikmenstan 90-orynda.
Al tizim sońyna Aýǵanstan pasporty ornalastyrylǵan. Aýǵan tólqujatynyń ıeleri álemniń 26 baǵytyna ǵana vızasyz kire alady.
Irak pen Sırııanyń tólqujattary sońynan sanaǵanda ekinshi jáne úshinshi oryndarda.
