Qazaqstan pasporty Ortalyq Azııada eń bedeldi
ASTANA. KAZINFORM – Qazaqstan pasporty Global Passport Index 2026 reıtınginde Ortalyq Azııa elderi arasynda birinshi orynǵa ıe boldy. Jalpy tizimde respýblıka 109-orynǵa ornalasyp, óńirdegi barlyq kórshi memleketti basyp ozdy.
Reıtıngte Qazaqstan Maldıv araldary men Belarýstiń arasynda ornalasqan. Salystyrmaly túrde aıtar bolsaq, Ózbekstan - 123, Qyrǵyzstan – 127, Tájikstan – 140, al Túrikmenstan 144-oryndy ıelendi.
Zertteýge sáıkes, Qazaqstan azamattary 48 elge vızasyz saparlaı alady. Sonymen qatar Qytaı, Belarýs, Tájikstan, Ózbekstan jáne Andorra syndy birqatar memleketke jeńildetilgen tártippen kirýge nemese shekarada vıza rásimdeýge múmkindik bar.
Al AQSh, Ulybrıtanııa, Germanııa, Frantsııa jáne Japonııany qosa alǵanda, shamamen 85 memleketke barý úshin Qazaqstan azamattaryna aldyn ala vıza rásimdeý qajet.
Reıtıng avtorlary saparǵa qoljetimdi baǵyttardyń sanyn ǵana emes, sondaı-aq azamattyqtyń «kúshine» áser etetin basqa da kórsetkishterdi baǵalaıdy. Olardyń qatarynda ınvestıtsııalyq tartymdylyq pen ómir súrý sapasyn ataýǵa bolady.
Osy krıterııler boıynsha Qazaqstan keńeıtilgen mobıldilik ındeksinde - 112, ınvestıtsııalyq ındeks boıynsha - 61, al ómir súrý sapasy ındeksinde 112-oryndy ıelendi. Eldiń eń joǵary kórsetkishi ınvestıtsııalyq tartymdylyq baǵyty boıynsha tirkeldi.
Global Passport Index 2026 reıtıngine jalpy 197 el men aýmaq engizilgen. Reıtıng halyqaralyq mobıldilik, ınvestıtsııalyq tartymdylyq jáne ómir súrý sapasy sııaqty úsh negizgi sanatqa biriktirilgen 14 kórsetkish negizinde jasalady.
Álemdik reıtıngte birinshi oryndy Shvetsııa ıelendi. Alǵashqy bestikke sondaı-aq Shveıtsarııa, Fınlıandııa, Germanııa, sondaı-aq besinshi oryndy bólisken Danııa men Nıderland endi.
Sonymen qatar Qazaqstan halyqaralyq baılanysyn keńeıtip, ınvestıtsııalyq áleýetin damyta otyryp, pasport bedeliniń kórsetkishi boıynsha Ortalyq Azııadaǵy kóshbasshy mártebesin saqtap keledi.
Aıta keteıik, Henley Passport Index reıtınginiń jańartylǵan derekterine sáıkes, Qazaqstan pasporty halyqaralyq reıtıngide 57-orynda tur.
