Qazaqstan Parsy shyǵanaǵymen yntymaqtastyqty keńeıtpek
Taraptar Ortalyq Azııanyń PShAMYK-pen óńiraralyq yntymaqtastyǵynyń perspektıvalaryn, Qazaqstannyń arab elderimen ózara is-qımylyn talqylady, sondaı-aq halyqaralyq kún tártibindegi ózekti máseleler boıynsha pikir almasty.
M.Tileýberdi óz sózinde PShAMYK búginde Qazaqstan úshin aıtarlyqtaı qyzyǵýshylyq týdyratyn qarqyndy damyp kele jatqan halyqaralyq uıym ekenin dep atap ótti.
«Bizdiń respýblıkamyz Shyǵanaqtaǵy arab elderimen turaqty jáne dostyq qarym-qatynastary ornatqan jáne osy óńirmen saýda-ekonomıkalyq, ınvestıtsııalyq jáne mádenı-gýmanıtarlyq yntymaqtastyqty odan ári damytýǵa nıetti. Qazaqstan PShAMYK-tiń barlyq múshe memleketterdiń azamattary úshin vızasyz rejım engizip, SAK, BAÁ, Qatar jáne Kýveıtpen tikeleı áýe qatynasyn ashty. Shyǵanaq elderi Qazaqstan ekonomıkasynyń iri ınvestorlary», - dedi SІM basshysy.
Óz kezeginde, N.Hadjraf PShAMYK múshe memleketteri Ortalyq Azııa óńirimen yntymaqtastyqtyń kópjaqty formatyn ornatýǵa múddeli ekenin, sondaı-aq jaqyn arada «OA - PShAMYK» dıalog alańynyń alǵashqy mınıstrlik kezdesýin ótkizýge daıyn ekenin málimdedi.
Kelissózder barysynda taraptar 2021 j. 12 qazanda qol qoıylǵan Qazaqstannyń Syrtqy ister mınıstrligi men PShAMYK Bas hatshylyǵy arasyndaǵy ózara túsinistik týraly Memorandýmnyń mańyzdylyǵyn atap ótti. Bul qujat Qazaqstanǵa ekijaqty, sondaı-aq kópjaqty formatta PShAMYK Bas hatshylyǵymen ózara yntymaqtastyq orantýǵa múmkindik beredi.
Kezdesý qorytyndysy boıynsha dıplomattar Qazaqstan men PShAMYK elderi arasyndaǵy dostyq qarym-qatynastardy damytýǵa jáne nyǵaıtýǵa birlesken kúsh-jigerdi jalǵastyrýǵa kelisti.
Qazaqstanǵa sapary aıasynda PShAMYK Bas hatshysyn QR Premer-Mınıstri Álihan Smaıylov qabyldady.
Aıta ketsek, Parsy shyǵanaǵynyń arab memleketteriniń yntymaqtastyq keńesi 1981 jyly quryldy. Shtab-páteri Rııad qalasynda ornalasqan. Keńestiń músheleri - Saýd Arabııasy Koroldigi, Birikken Arab Ámirlikteri, Bahreın Memleketi, Oman Sultandyǵy, Katar jáne Kýveıt .
Foto: gov.kz
