Qazaqstan parnıktik gaz shyǵaryndylarynyń úzdik 30 emıtentiniń qataryna kiredi
ASTANA. KAZINFORM — PІB Prezıdenttik ortalyǵynda «Taza Qazaqstan: ekologııa jáne jastar» atty kezdesý ótti, onyń spıkeri Elektr energetıkasyn damytý jáne energııa únemdeý ınstıtýty óńdeý jáne taldaý departamentiniń dırektory Marat Qalmenov boldy.
Sharany Prezıdenttik ortalyǵy dırektorynyń orynbasary Serik Sydyqov ashyp, quttyqtaý sóz sóıledi.
Marat Qalmenov Qazaqstandaǵy ekologııalyq máselelerdiń mańyzdy taqyryptaryna, elimizdiń halyqaralyq ekologııalyq kelisimderge qatysýy men mindettemelerine jáne klımattyń ózgerýine qarsy kúreste energııa únemdeýdiń róline toqtaldy.
Spıker qorshaǵan ortaǵa shyǵarylatyn qaldyqtardyń negizgi kózderi jáne olardy qysqartý boıynsha qabyldanyp jatqan sharalar týraly aıtty. Ol keltirgen statıstıkalyq derekter tyńdaýshylardyń erekshe qyzyǵýshylyǵyn týdyrdy. Mysaly, Qazaqstan parnıktik gazdar shyǵaryndylarynyń úzdik 30 emıtentiniń qataryna kiredi, shyǵaryndylar kólemi boıynsha álemde 23-orynda, jan basyna shaqqandaǵy shyǵaryndylar kólemi boıynsha 11-orynda jáne JІÓ-ge qatysty shyǵaryndylar kólemi boıynsha 9-orynda.
Qazaqstannyń parnıktik gazdar shyǵaryndylaryn azaıtý jónindegi qadamdary týraly aıta kele, Marat Qalmenov SO2 shyǵaryndylary boıynsha saýda kvotalarynyń ulttyq júıesin damytýdy, «jasyl» tehnologııalar men ekologııalyq bastamalardy qoldaýdy, halyqaralyq klımattyq kelisimderge qatysýdy atap ótti.
— Mańyzdy qadamdardyń biri — qazba otyndaryna táýeldilikti azaıtýǵa jáne turaqty ekonomıkany qurýǵa kómektesetin tómen kómirtekti jobalarǵa ınvestıtsııa tartý, — dedi ol.
Aıta ketý kerek, kezdesý tanymdyq jáne syndarly ótti, stýdentterdiń klımattyq ózgerister týraly habardarlyǵyn arttyrdy, olar energııa únemdeý jáne ekologııalyq jaýapkershilik taqyrybyna qyzyǵýshylyq tanytty.
Eske salsaq Prezıdent «Taza Qazaqstan» – ár adamnyń kúndelikti daǵdysy, ómir salty bolýy qajet ekenin aıtqan edi.