Qazaqstan parnıktik gaz shyǵaryndylaryn azaıtýdyń jańa tetigin engizbek
ASTANA. KAZINFORM — Májiliste Parıj kelisimi aıasynda Qazaqstandaǵy klımat ózgerisiniń saldaryn azaıtýǵa baǵyttalǵan jańa tetikti engizý máselesi talqylandy.
Bul máseleni Májilis depýtaty Natalıa Dementeva Ekologııa jáne tabıǵı resýrstar mınıstrliginiń ókilderine joldady. Depýtat usynylyp otyrǵan tetiktiń qazirgi normalardan aıyrmashylyǵy qandaı ekenin, ony iske asyrý kezinde qandaı qıyndyqtar baryn jáne qandaı nátıje kútiletinin surady.
Ekologııa jáne tabıǵı resýrstar vıtse-mınıstri Jomart Álıevtiń aıtýynsha, qoldanystaǵy ekologııalyq zańnama Parıj kelisimin júzege asyrýda negizinen ishki retteýge baǵyttalǵan jáne halyqaralyq mindettemelerdi tolyq qamtymaıdy.
— Usynylyp otyrǵan ózgerister retteý tetikterin jańǵyrtyp, onyń aıasyn ishki naryqpen qatar syrtqy naryqqa da keńeıtýge múmkindik beredi. Bul bir jaǵynan parnıktik gaz shyǵaryndylaryn azaıtýǵa yqpal etse, ekinshi jaǵynan Qazaqstanǵa sheteldik ınvestor tartýǵa jáne kómirtek birlikteriniń elden tys aınalymyna jol ashady, — dedi vıtse-mınıstr.
Onyń sózinshe, jańa tásilder Qazaqstannyń Parıj kelisimi boıynsha mindettemelerin tıimdi oryndaýǵa múmkindik beredi. Sonymen qatar bul klımattyq jobalardy damytýǵa jáne ınvestorlardyń qyzyǵýshylyǵyn arttyrýǵa qosymsha serpin bermek.
Vıtse-mınıstr jańartylǵan tetik ekologııalyq saıasatty iske asyrýdyń tıimdiligin arttyryp, júıeni ıkemdirek ári tájirıbege beıim etýge jol ashatynyn aıtty.
Buǵan deıin Qazaqstan qaldyqtardy basqarý baǵytynda 99-orynda turǵanyn jazǵanbyz.
