Qazaqstan parnıkti gazdar deńgeıin 1992 jylǵa qaraǵanda 2020 jyly 15 paıyzǵa, 2050 jyly 25 paıyzǵa tómendetýdi josparlap otyr - N. Áshimov
ASTANA. Qarashanyń 16-sy. QazAqparat /Qanat Mámetqazyuly/ ‑ Qazaqstan parnıkti gazdar deńgeıin 1992 jylǵa qaraǵanda 2020 jyly 15 paıyzǵa, 2050 jyly 25 paıyzǵa tómendetýdi josparlap otyr.
Búgin QR Parlamenti Májilisinde ótken Úkimet saǵatynda QR Qorshaǵan ortany qorǵaý mınıstri Nurǵalı Áshimov osylaı málim etti, dep habarlaıdy QazAqparat.
«Qazaqstan ǵalamdyq klımattyń ózgerýine qatysty halyqaralyq úderistege belsendi aralasyp keledi. 2009 jyly osy baǵyttaǵy Kıoto hattamasy ratıfıkatsııalandy. Osyǵan oraı, halyqaralyq deńgeıde Qazaqstan úsh mańyzdy sheshim qabyldady. Atap aıtqanda, Kıoto hattamasy maqsatynda elimizdi 1 Ereje boıynsha anyqtaıtyn Marrakesh sheshimi qabyldandy. Ekinshiden, Naırobı sheshimi boıynsha Qazaqstan úshin 1992 jylǵy bazalyq kórsetkishter anyqtalady. Úshinshiden, Poznan sheshimi boıynsha Qazaqstan ózine 2008-2012 jyldar aralyǵynda shyǵaryndylar kólemin 1992 deńgeıden asyrmaý týraly erikti mindetteme alady», dedi N. Áshimov.
Sonymen birge, Kıoto hattamasynyń oryndalý barysynda qazaqstannyń mindettemelerine toqtalǵan mınıstr, qazirgi kúni Qazaqstan qosylǵan 1 Ereje boıynsha 2020 jylǵa deıin parnıkti gazdardy shyǵarýdy tómendetý baǵytynda sharalardyń qabyldanatynyn atap ótti. «Eýroodaq 2020 jylǵa qaraı parnıkti gazdardy 1990 jylǵy deńgeıden 20-30 paıyzǵa tómendetýdi josparlap otyr. Al Japonııa, 2005 jyldan 15 paıyzǵa, Kanada 2006 jylǵydan 20 paıyzǵa, Reseı 1990 jylǵydan 15, Ýkraına 20 paıyzǵa, AQSh 2005 jylǵydan 14-18 paıyzǵa tómendetýdi boljaýda. Budan bólek, Eýroodaq parnıkti gazdardy 2050 jylǵa qaraı 2009 jylǵy deńgeıden 80 paıyzǵa deıin tómendetý týraly óziniń nıetin de bildirgen bolatyn. Al Qazaqstan 1992 jylǵy bazalyq kórsetkishteri deńgeıine qaraǵanda parnıkti gazdardy shyǵarýdy 2020 jyly 15 paıyzǵa, 2050 jyly 25 paıyzǵa tómendetýdi josparlap otyr», dedi mınıstr.
