Qazaqstan Parlamentinde áıelderdiń úlesi az – Katarjına Vavernıa
ASTANA. KAZINFORM – Qazmedıa ortalyǵynda QR Memlekettik qyzmet isteri agenttiginiń bastamasymen «Zamanaýı memlekettik qyzmet: teń jaǵdaılar men múmkindikter» taqyrybynda pikir almasý ótti.
Jıynda sóz alǵan BUU Damý baǵdarlamasynyń Qazaqstandaǵy turaqty ókili Katarjına Vavernıa Qazaqstan parlamentindegi áıelderdiń úlesi kóńil kónshitpeıtinin aıtty.
Bul jónindegi Parlamentaralyq odaq assambleıasynyń reıtınginde Qazaqstan byltyr 1 qańtardaǵy jaǵdaı boıynsha 186 eldiń arasynda 84-shi orynǵa turaqtaǵan. Ótken jyldyń kókteminde áıel dıplomattar sanynyń azaıýy Qazaqstandy 120-orynǵa nemese odan da tómen oryndarǵa syrǵytýy múmkin.
Dese de, Katarjına Vavernıa saıası arenadaǵy áıelder úlesiniń az bolýy álemniń kóptegen elderine ortaq úrdis ekenin atap ótti.
«Qazaqstan jahandyq ózgeristerden qalmaı, genderlik saıasat baǵytynda júıeli jumystardy atqaryp keledi. El saıasatynda, memlekettik qyzmet salasynda áıelderdiń úlesi artýda. Dese de, atqarylar sharýa az emes. Áıelderdiń saıası rólin arttyrýdyń eń tanymal ádisteriniń biri - genderlik kvotalar. Bul baǵytta qazaqstandyq model erekshelenedi. Sebebi jastar men múmkindigi shekteýli jandardyń saıası arenaǵa joldama alýyna múmkindik beriledi», - dedi ol.
Jıynda memlekettik qyzmettegi teń jaǵdaılar men múmkindikterdi qamtamasyz etý máseleleri talqylanyp, genderlik teńdik, talanttar básekelestigi jaǵdaıyndaǵy jastardyń mansaptyq ilgerileýi, ınklıýzıvti qoǵamdy damytý boıynsha quqyqtyq negizderdi odan ári qalyptastyrýǵa baǵyttalǵan usynystar aıtyldy.
QR Memlekettik qyzmet isteri agenttigi tóraǵasynyń orynbasary Salaýat Múksimovtiń málimetinshe, búginde memlekettik qyzmetshilerdiń jalpy sanynyń 55,7 paıyzyn áıelder quraıdy. Olardyń basshy laýazymdar arasyndaǵy úles salmaǵy – 39,4 paıyz.
Sondaı-aq, jıynda Ádep normalaryn saqtaýdy qamtamasyz etýdegi áıelderdiń róli týraly aıtyldy. Búginde Ádep jónindegi ýákilderdiń 38% áıelder eken. Jalpy, memlekettik qyzmettegi áıelder ádeptilik standarttaryn saqtaı otyryp, jaýapkershilik pen quzirettiliktiń joǵary deńgeıin kórsetip otyr.
Elimizde qashyqtyqtan jáne ıkemdi jumys ýaqyty rejıminde jumys isteý belsendi qoldanylýda. Bul, ásirese, jas balalardy tárbıelep otyrǵan analarǵa óz kásibı mindetterin jeke ómirimen tıimdi úılestirýge múmkindik beredi. Osy formattaǵy jumys kestesin qoldanýshy 3024 memlekettik qyzmetshiniń 63 paıyzyn áıelder quraıtynyn atap ótken jón.
