Qazaqstan Parlamentinde 31 áıel bar – Olga Perepechına
ASTANA. KAZINFORM – Qazaqstan Respýblıkasy Parlamenti Senaty Tóraǵasynyń orynbasary Olga Perepechına Qazaqstan áıelder quqyqtaryn qorǵaý jáne genderlik teńdik máselelerin ilgeriletý salasynda aıtarlyqtaı nátıjege qol jetkizgenin atap ótti. Bul týraly QR Parlamentiniń senaty málimdedi.
Qazaqstan Respýblıkasy Parlamenti Senaty Tóraǵasynyń orynbasary Olga Perepechına BUU Damý baǵdarlamasynyń Eýropa jáne TMD jónindegi Aımaqtyq bıýrosy Ákimshisi kómekshisiniń orynbasary jáne dırektordyń orynbasary Nık Hartmanmen kezdesti.
Genderlik saıasattyń ulttyq úlgisi, quqyqtyq baza jáne adam quqyqtaryn qorǵaý tetigi jasalǵany aıtyldy.
«Memleket basshysy júrgizip otyrǵan áleýmettik jańǵyrtýdaǵy negizgi baǵyttardyń biri – Qazaqstanda genderlik tepe-teńdikke qol jetkizý, áıelderdiń saıası, ekonomıkalyq jáne áleýmettik ómirge belsendi qatysýǵa teń múmkindikter jasaý bolyp tabylady. Saılaýdaǵy partııa tizimderine, sondaı-aq depýtattyq mandattardy bólý kezinde áıelderge, jastarǵa jáne múgedektigi bar adamdarǵa zańnamalyq deńgeıde 30% kvota engizildi. Búgingi tańda elimizdiń joǵary ókildi organy – Qazaqstan Parlamentinde 31 áıel bar, ol jalpy depýtattar sanynyń 21%-yn quraıdy. Onyń ishinde Senattyń 24%-y, Májilistiń 19%-y áıelder bolyp otyr», - dedi Olga Perepechına.
Kezdesýge qatysýshylar adam áleýetin damytý men teńdeı qatysý, tıimdi ınstıtýttar, adam quqyqtary men genderlik teńdik, sondaı-aq ınklıýzıvti ekonomıkalyq ósý men ekologııalyq turaqtylyq salasyndaǵy yntymaqtastyqty odan ári damytý máselelerin talqylady.
Parlamentshi turaqty damý salasyndaǵy ulttyq maqsattar men mindetterdiń iske asýyna monıtorıng júrgizý jónindegi parlamenttik komıssııanyń otyrystary týraly aıtyp berdi. Onda densaýlyq saqtaý men bilim berýdiń sapasyn kóterý jáne ekologııany qamtamasyz etý máseleleri qaraldy.
Nık Hartmann óz kezeginde Qazaqstanda júrgizilip jatqan qoǵamdyq-saıası ózgeristerdi joǵary baǵalady jáne barlyq baǵyttardaǵy yntymaqtastyq aıasyn keńeıtýge nazar aýdardy.
