Qazaqstan Parlamentinde demokratııanyń jańa dástúrleri qalyptasyp jatyr - M. Áshimbaev
ASTANA. 13 tamyz. QazAqparat - Qazaqstan Parlamentinde demokratııanyń jańa dástúrleri qalyptasyp jatyr. Búgin Astanadaǵy Ulttyq muraǵat ǵımaratynda halyqpen kezdesken Parlament Májilisiniń depýtaty Máýlen Áshimbaev osylaı málim etti.
Kezdesý barysynda zań shyǵarmashylyǵy qyzmetine toqtalǵan depýtat kóppartııaly Májilistiń ereksheligine de mán berip ótti. «Jalpy bul asa durys úrdis. Óıtkeni, ártúrli partııanyń ókilderi bolǵandyqtan, onda túrli pikirler aıtylady, ártúrli oılar, ustanymdar bolady. Al sondaı pikir alshaqtyǵy zańdardy sapaly pysyqtaý úshin asa qajet dúnıe. Sondyqtan da, Parlamentte demokratııanyń, parlamentarızmniń jańa dástúrleri qalyptasyp jatyr deýge bolady», - dedi Máýlen Áshimbaev.
Onyń aıtýynsha, sońǵy jańalyqtarǵa oraı, Qazaqstannyń saıası júıesinde Parlamenttiń de róli artyp keledi. «Sondyqtan da, demokratııalyq úrdisterdi tolyq qoldaımyz. Al kóppartııaly Parlament birinshi sessııanyń ózinde qyrýar jumystar atqara aldy», - dedi Halyqaralyq ister, qorǵanys jáne qaýipsizdik komıtetiniń tóraǵasy. Depýtattyń sózine qaraǵanda, besinshi Parlamenttiń birinshi sessııasynda Májilis depýtattary 70 zań jobasymen jumys istep, onyń 39-yn Senattyń qaraýyna jibergen. Al sonyń 22-sine Memleket basshysy qol qoıyp, kúshine engizgen. Kezdesý barysynda depýtat, qabyldanǵan zańdarda qamtylǵan birqatar jańalyqtarǵa da toqtalyp ótti.
