Qazaqstan Parlamenti jaıylymdar týraly zań jobasyn qabyldady
«Parlament Senaty engizgen túzetýler zań jobasynyń tujyrymdamalyq erejelerin qozǵamaıdy. Atap aıtqanda, zań jobasy «arıdti jaıylymdar», «jaıylymdardy sýlandyrý» jáne «jaıylymdardyń jem-shóp mólsheri» degen jańadan qabyldanǵan uǵymdarǵa qatysty erejelermen tolyqtyrylady», - dedi Agrarlyq máseleler komıtetiniń hatshysy Jeksenbaı Dúısebaev.
Sonymen qatar komıtet qorytyndysyna qaraǵanda, Senat engizgen túzetýler zań jobasynyń tujyrymdamalyq erejelerin ózgertpeı, tek olardyń mazmunyn naqtylaıtynyn eskere otyryp, ózgerister kelisildi.
«Jaıylymdar týraly» zań jobasynyń maqsaty - jaıylymdardy ońtaıly paıdalanýǵa, sonyń ishinde jaıylym alqaptaryna degen turǵyndardyń suranysyn qamtamasyz etý boıynsha aýyl sharýashylyǵy janýarlaryn ustaý úshin jaǵdaı jasaýǵa, jaıylym ınfraqurylymy nysandarynyń jaı-kúıin jaqsartý, jaıylymdardyń tozýyn boldyrmaýǵa baılanysty qoǵamdyq qatynastardy retteý bolyp tabylady.
Sonymen qatar jalpy otyrysta depýttar «Qazaqstan Respýblıkasynyń keıbir zańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» Zań jobasyna Senat engizgen ózgerister men tolyqtyrýlarǵa kelisim berdi.
Budan buryn habarlanǵandaı, ótken aptada Senattyń jalpy otyrysynda «Jaıylymdar týraly», «Qazaqstan Respýblıkasynyń keıbir zzańnamalyq aktilerine jaıylymdardy paıdalaný máseleleri boıynsha ózgerister men tolyqtyrýlar engizý týraly» zań jobalary qaraldy. Osy eki qujatqa birqatar túzetýler jasalǵandyqtan, zań jobalary Májiliske qaıtarylǵan bolatyn .
