Qazaqstan Parlamenti tsıfrlyq úlgige kóshe bastady – Danııa Espaeva

ASTANA. KAZINFORM – Qazaqstanda Parlamentti tsıfrlyq modelge aýystyrý jumystary bastaldy. Bul týraly Parlamentarızm ınstıtýty negizi qalanýynyń bes jyldyǵyna arnalǵan Eýrazııalyq forýmda sóz sóılegen Májilis tóraǵasynyń orynbasary Danııa Espaeva málimdedi, dep habarlaıdy Kazinform tilshisi. 

Danııa Espaeva Prezıdenttiń Qazaqstandy úsh jyl ishinde tolyqqandy tsıfrlyq elge aınaldyrý týraly qoıǵan maqsatyn eske saldy. 

- Parlament depýtattary osy sessııada «Jasandy ıntellekt týraly» zań men Tsıfrlyq kodeksti bastamashylyq etip, qabyldap, bul aýqymdy sheshimdi zańnamalyq turǵydan qoldady. Bul quqyqtyq aktiler tsıfrlyq tehnologııalar men jasandy ıntellektke negizdelgen jańa áleýmettik qatynastardyń negizin qalaıdy, - dedi vıtse-spıker.

Ol parlament depýtattaryna zań shyǵarý jumysynyń tıimdiligin arttyrý úshin tsıfrlyq sheshimderdi paıdalanýynyń mańyzdylyǵyn atap ótti. 

- Biz Parlamenttiń tsıfrlyq modeline kóshý boıynsha jumysty bastadyq. «e-Parlament» biryńǵaı aqparattyq júıesi ázirlenip jatyr. Bul keshendi tsıfrlyq júıe parlamenttik zań shyǵarý protsesterin avtomattandyrýǵa arnalǵan. Biz «e-Parlament»-tiń bastapqy kezeńindemiz, biraq artyqshylyqtary aıqyn: ishki parlamenttik barlyq protsester ońtaılandyrylady, - dep atap ótti Espaeva. 

Ol sondaı-aq júıeniń Elektrondy úkimet platformalarymen biriktiriletinin qosyp ótti. 

Eske sala ketsek, Memleket basshysy aldaǵy ýaqytta e-Parlament suranysqa ıe quralǵa aınalýy múmkin ekenin jetkizdi.