Qazaqstan Parıjde Ortalyq Azııa elderi UOK-teri men AOK arasynda kezdesý uıymdastyrdy
PARIJ. KAZINFORM – 2024 jylǵy Olımpıada qarsańynda Qazaqstan UOK Parıj tórinde Ortalyq Azııa elderindegi UOK ókilderiniń kezdesýin ótkizdi. Bul Gennadıı Golovkınniń «olımpıadalyq» kestesindegi alǵashqy resmı kezdesýi ekenin atap ótý kerek.
Іs-sharaǵa tanymal tulǵalar qatysty. HOK Sessııasyna baılanysty tyǵyz jumys kestesine qaramastan, atalǵan jıynǵa Azııa Olımpıada odaǵynyń qazirgi prezıdenti ári HOK múshesi Radja Randhır Sıngh, UOK-termen qarym-qatynas, Olımpıadalyq yntymaqtastyq jáne Olımpızm 365 jónindegi HOK dırektory Djeıms Maklod, HOK dırektorynyń orynbasary Olıve Nıamkı men Azııadaǵy yntymaqtastyq jaıly HOK olımpıadalyq baǵdarlamasynyń úılestirýshi Edvard Kensıngton qatysty.
«Shaqyrǵandaryńyzǵa kóp raqmet. Sizdiń aımaqtyń birikkeni úshin óte qýanyshtymyn. Sizdermen dál osy jerde, Parıj tórinde kezdesý men úshin mártebe. Biz ortaq múddeler úshin jumys isteıtin bir otbasymyz. Sondyqtan sizderdiń bastamashyl usynystaryńyz bárimizdi maqsatqa jetý jolynda biriktiredi. 1995 jyly Ózbekstanda alǵash ret Ortalyq Azııa oıyndary ótkeni esimde. Uıymdastyrý isine HOK atsalysty jáne sol kezde bul úlken jetistik edi. Sizderdiń atalǵan jarysty qaıta jańǵyrtý jóninde bastama kótergenderińiz meni qatty qýantady. Aımaqtyq oıyndardy ótkizýdiń mańyzy zor. Bul búkil óńirdi damytý jolyndaǵy óte mańyzdy qadam. Ortalyq Azııadaǵy sportty damytýǵa baǵyttalǵan barlyq bastamalaryńyzdy HOK qoldaıtynyna senimdimin», - dedi Sıngh.
Kezdesýge Azııa Olımpıada keńesiniń bas dırektory ári Halyqaralyq sý sporty túrleri federatsııasynyń basshysy Hýsaın Ál Mýsallam men onyń orynbasary Vınj Tıvarı qatysty. Sondaı-aq, qonaqtar qatarynda HOK múshesi ári Býtan UOK prezıdenti EKV Prınts Dasho Djıgel Ýgen Vangchýk te bar.
«Uzaq jyldar boıy biz ortaq maqsatymyz úshin ter tógip, eńbek etýden jalyqpadyq. Endi mine, eń mańyzdy sátke – Olımpıada oıyndarynyń bastalar kúnine de jettik. HOK atynan barshańyzǵa qoldaýlaryńyz úshin alǵys aıtamyn. Bul oıyn sizderdiń quramalaryńyz úshin sátti ótedi dep úmittenemin. Árıne, biz qıyn kezeńderdi bastan keshtik, endi Azııanyń birigetin ýaqyty jetti. Parıj Olımpıadasy osy bastamaǵa jol ashady dep oılaımyn. Parıj tórinde báriniń basyn qosý – keremet bastama. Kezdesý nátıjesinde Ortalyq Azııa oıyndaryn ótkizý syndy bastamalar kóterile me, ol óz erikterińiz. HOK sizderdi jáne sizdiń sportshylardy únemi qoldaıtynyn esten shyǵarmaý kerek. Aıtpaqshy, Olımpıadalyq yntymaqtastyq aıasynda qarjylandyrý deńgeıin arttyra alǵanymyz qýantady. Ózderińiz biletindeı, bul qarajattyń bir bóligin osyndaı bastamalardy qoldaýǵa qoldanýǵa bolady», - dedi Parıj oıyndarynda UOK basshylaryna sáttilik tilegen HOK dırektory Djeıms Maklod.
Otyrysqa Ortalyq Azııadaǵy AOK qataryna enetin Qazaqstan, Qyrǵyzstan, Aýǵanstan, Iran, Tájikstan, Túrkmenstan jáne Ózbekstannyń UOK prezıdentteri men bas hatshylary qatysty.
Jıyn barysynda aımaqta birlesip jumys isteýge qatysty suraqtar talqylandy. Kezdesýdegi basty taqyryptardyń biri 2005 jyldan beri ótkizilmegen Ortalyq Azııa oıyndaryn qaıta jańǵyrtý máselesi bolatyn. Qazaqstan oıyn baǵdarlamasyn 10-12 olımpıadalyq sport túrlerine deıin qysqartyp, qatysýshylardyń jas sanatyn 14-18 jas aralyǵyna jetkizýdi usyndy. Sebebi, bul ulttyq quramalardyń rezervin jetildirýge múmkindik beredi.
Jarys reglamentine baılanysty HOK men AOK ókilderi óz usynystaryn aıtyp, Ortalyq Azııa elderiniń bastamalaryn, onyń ishinde, Olımpıadalyq yntymaqtastyq aıasynda júzege asatyn is-sharalardy qoldaýǵa daıyn ekenderin jetkizdi.
Taraptar qurlyqtaǵy aımaq rolin nyǵaıtý, sondaı-aq, memleketter arasyndaǵy ózara qarym-qatynasty turaqty jolǵa salý qajettigin talqyǵa saldy. Odan bólek, alda ótetin Azııa Olımpıada keńesiniń Bas Assambleıasy talqylanyp, otyrys barysynda ótetin saılaý týraly sóz qozǵaldy.
«Halyqaralyq Olımpıada komıteti, Azııa Olımpıadalyq keńesi men Ortalyq Azııadaǵy áriptesterimizge Olımpıada qarsańyndaǵy qarbalasqa qaramastan ýaqyt bólip, bizdiń bastamamyzdy qoldaǵany úshin alǵys aıtamyn. Bizdiń maqsatymyz aıqyn – bul aımaqtaǵy ǵana emes, HOK pen AOK-tegi áriptesterimizben seriktestikti nyǵaıtý. Kúshimizdi biriktirý arqyly biz atletterimizge, UOK-terimizge jáne ǵalamdyq olımpıadalyq qozǵalystyń damýyna múmkindik jasap, bıik belesterdi baǵyndyratynymyzǵa senemin», - dep atap ótti Gennadıı Golovkın.
Ortalyq Azııa elderindegi UOK ókilderi mundaı kezdesýlerdi turaqty túrde ótkizip, aımaqtyń sporttyq yqpalyn kúsheıtý jolynda jumys isteýge kelisti jáne aldaǵy Olımpıada oıyndarynda bir-birine sáttilik tiledi.
Kelesi joly Ortalyq Azııadaǵy sporttyq uıym basshylary qyrkúıektiń sońynda Qyrǵyzstanda (Ystyqkól) kezdesýdi josparlap otyr.
