Qazaqstan Parıjde 93-shi Dúnıejúzilik janýarlar densaýlyǵy uıym sessııasyna qatysyp jatyr
ASTANA. KAZINFORM - Qazaqstan 18–22 mamyr aralyǵynda Parıj qalasynda ótip jatqan Dúnıejúzilik janýarlar densaýlyǵy uıymnyń 93-shi Bas sessııasyna qatysyp jatyr, dep habarlaıdy QR aýyl sharýashylyǵy mınıstrliginiń baspasóz qyzmeti.
Kún tártibindegi negizgi máseleler – bıologııalyq qaýipsizdik, janýarlardyń transshekaralyq aýrýlaryna qarsy kúres jáne veterınarııa salasyndaǵy halyqaralyq yntymaqtastyqty nyǵaıtý.
Aýyl sharýashylyǵy mınıstri Aıdarbek Saparov 182 memleketten kelgen delegatsııalar aldynda sóz sóılep, veterınarııalyq qyzmetti jańǵyrtý baǵytyndaǵy elimizdiń tájirıbesin tanystyrdy.
Aıdarbek Saparov jahandyq bıologııalyq qaterlerdiń artýy jaǵdaıynda veterınarııalyq qaýipsizdik máseleleri erekshe mańyzǵa ıe bolyp, memleketterdiń azyq-túlik jáne sanıtarlyq turaqtylyǵynyń mańyzdy quramdas bóligine aınalǵanyn atap ótti.
-Búginde álemdik qaýymdastyq janýarlardyń asa qaýipti aýrýlarynyń transshekaralyq taralý qaýpiniń kúsheıýimen betpe-bet kelip otyr. Mundaı jaǵdaıda jahandyq veterınarııalyq qaýipsizdiktiń tıimdiligi halyqaralyq yntymaqtastyqqa, ashyqtyqqa jáne memleketterdiń birlesip áreket etýge daıyndyǵyna tikeleı baılanysty, – dedi mınıstr.
Mınıstr Dúnıejúzilik janýarlar densaýlyǵy uıymnyń Qazaqstanda Sýbóńirlik ókildik ashqany úshin rızashylyǵyn bildirdi.
Onyń aıtýynsha, atalǵan ókildik óńirlik yntymaqtastyqty damytýǵa, halyqaralyq veterınarııalyq standarttardy ilgeriletýge jáne aımaq elderi arasynda tájirıbe almasýǵa arnalǵan tıimdi alańǵa aınaldy.
Mal sharýashylyǵy áleýeti joǵary ári syrtqy shekarasy uzyn Qazaqstan úshin epızootııalyq ahýaldyń turaqtylyǵyn qamtamasyz etý strategııalyq mańyzǵa ıe. Memlekettiń dáıekti saıasatynyń arqasynda el turaqty epızootııalyq ahýaldy saqtap, halyqaralyq mártebelerin rastap, mal sharýashylyǵy ónimderiniń eksporttyq múmkindikterin keńeıtip keledi. Qazirgi ýaqytta et ónimderi álemniń 20 eline eksporttalady.
Memleket basshysynyń tapsyrmasymen 2026–2030 jyldarǵa arnalǵan Mal sharýashylyǵyn damytý jónindegi keshendi jospar júzege asyrylyp jatyr. Bul jospar aýyl sharýashylyǵy janýarlarynyń sanyn kóbeıtýge, ónimdilikti arttyrýǵa jáne salanyń eksporttyq áleýetin damytýǵa baǵyttalǵan. Sonymen qatar, 2026–2030 jyldarǵa arnalǵan Veterınarııalyq qyzmetti damytý jónindegi keshendi jospar ázirlenip, ınfraqurylymdy jańǵyrtý, materıaldyq-tehnıkalyq bazany jańartý jáne veterınarııalyq baqylaý júıesin jetildirý kózdelgen.
Eldiń veterınarııa salasynda 15 myńnan astam maman eńbek etedi. Veterınarııalyq qyzmetti jańǵyrtý boıynsha naqty sharalar qabyldanyp, zamanaýı veterınarııalyq nysandar salynyp, arnaıy avtokólikter satyp alynyp jatyr.
Ǵylymı-dıagnostıkalyq bazany damytýǵa erekshe nazar aýdarylyp keledi. Úkimettiń qoldaýymen zerthanalardy zamanaýı jabdyqtarmen, sonyń ishinde sekvenatorlarmen, PTR jáne IFA júıelerimen, sondaı-aq joǵary tıimdi suıyqtyq hromatografııasy keshenderimen jabdyqtaý jumystary júrgizilý ústinde.
Kadr daıarlaý máselesi de mańyzdy baǵyttardyń biri bolyp qala beredi. Elde bilim berý baǵdarlamalary jetildirilip, epızootologtar, ıhtıopatologtar jáne zerthana qyzmetkerlerin qosa alǵanda, beıindi mamandardy daıarlaý jáne qaıta daıarlaý júıesi damytylý úsinde.
Mınıstr bıologııalyq qaýipsizdik salasyndaǵy halyqaralyq yntymaqtastyqtyń belsendi damyp kele jatqanyn da atap ótti.
BUU-nyń Azyq-túlik jáne aýyl sharýashylyǵy uıymy, Dúnıejúzilik bank jáne Pandemııalyq qor uıymdarymen birlesip, Qazaqstanda jalpy quny 4,7 mln AQSh dollaryn quraıtyn baǵdarlamalar iske asyrylyp jatyr. Bul baǵdarlamalar «Birtutas densaýlyq» tásilin engizýge, usaq kúıis qaıyratyn mal obasy men brýtsellezdi qosa alǵanda, asa qaýipti janýarlar aýrýlarynyń aldyn alý men baqylaýǵa baǵyttalǵan.
-Dúnıejúzilik janýarlar densaýlyǵy uıymnyń múshesi retinde Qazaqstan halyqaralyq standarttardy, ashyqtyq qaǵıdattaryn jáne ǵylymı negizdelgen tásildi dáıekti túrde ustanady, epızootııalyq aqparatpen ashyq almasýdy qamtamasyz etedi. Elimiz jahandyq bıologııalyq qaýipsizdikti nyǵaıtý jáne mal sharýashylyǵyn turaqty damytý múddesinde halyqaralyq seriktestermen yntymaqtastyqty odan ári keńeıtýge daıyn, – dep túıindedi Aıdarbek Saparov.
Aıta keteıik, Dúnıejúzilik janýarlar densaýlyǵy uıymnyń 93-shi Bas sessııasyna 30 eldiń mınıstrleri men 182 memlekettiń ulttyq delegattary qatysty.
Sessııa aıasynda janýarlardyń transshekaralyq aýrýlaryna qarsy kúres, halyqaralyq yntymaqtastyqty nyǵaıtý, jańa bıologııalyq qaterlerdiń aldyn alý jáne jahandyq veterınarııalyq qaýipsizdik júıesin kúsheıtý máseleleri talqylanýda.
Osyǵan deıin úı janýarlaryn azaptaǵandar qylmystyq jaýapkershilikke tartylatyny týraly jazdyq.
