Qazaqstan Parıj ortalyǵynda ótken halyqaralyq gastronomııalyq festıvalge qatysty
ASTANA. KAZINFORM – Búgin Frantsııa astanasynyń 17-okrýginde ótken halyqaralyq gastronomııalyq festıval aıasynda Qazaqstan Respýblıkasynyń ulttyq stendi tanystyryldy.
Senbi kúni Parıjdiń 17-okrýgindegi Port-Maıo alańy «Maillot à Table!» atty alǵashqy festıval aıasynda túrli mádenıetter men dámderdiń toǵysqan naǵyz merekelik alańyna aınaldy.
Festıval 17-okrýg merııasynyń bastamasymen uıymdastyryldy. Shara aıasynda parıjdikter men týrıster álem elderiniń aspazdyq dástúrlerimen tanysý múmkindigine ıe boldy.
Festıvalge tórt qurlyqtan kelgen 20-ǵa jýyq el ókilderi qatysty. Barlyǵy shamamen 30-ǵa jýyq degýstatsııalyq stend usynyldy. Solardyń qatarynda Qazaqstan da bar.
Frantsııadaǵy Qazaqstan elshiligi arnaıy kıiz úı tigip, qazaq ulttyq taǵamdary usynylǵan jeke stend uıymdastyrdy.
Kórmege 17-okrýgtiń meri Joffrýa Bolar arnaıy kelip, Qazaqstan Respýblıkasynyń Frantsııadaǵy Elshisi Gúlsara Arystanqulovamen kezdesip, qazaq dastarhanynan dám tatyp, kıiz úı ishindegi ulttyq turmyspen tanysty.
Qazaqstandyq stend pen kıiz úı jergilikti halyqtyń úlken qyzyǵýshylyǵyn týdyrdy. Sonymen qatar Parıjdegi «Abaı» mádenı ortalyǵynyń qatysýymen ótken dombyrashylardyń shaǵyn kontserti de festıval qonaqtaryna erekshe áser qaldyrdy.
Osylaısha, festıval aıasynda frantsýz jurtshylyǵy men qonaqtary Qazaqstannyń mádenıetimen jáne ulttyq taǵamdarymen jaqynyraq tanysty.
Eske salsaq, osyǵan deıin Qazaqstan men Frantsııa arasyndaǵy adamdardy readmıssııalaý týraly qujat qaralatyndyǵy habarlanǵan.
