«Qazaqstan Paramaýnt Injınırıng» JShS seriktestik týraly úshjaqty kelisimge keldi

ASTANA. QazAqparat - Qazirgi zamanǵy brondy dóńgelekti mashınalardy óndiretin Ortalyq Azııadaǵy iri kásiporyndardyń biri - «Qazaqstan Paramaýnt Injınırıng» JShS basshylyǵy reseılik «Býrevestnık» OǴZI-men jáne «BQKK» AQ-men úshjaqty memorandýmǵa qol qoıdy, dep habarlaıdy QazAqparat tilshisi QR Qorǵanys jáne aeroǵarysh ónerkásibi mınıstrliginiń baspasóz qyzmetine silteme jasap.

Taraptar 30-mm qashyqtyqtan basqarylatyn jaýyngerlik modýldi birlese jasaý men óndirý týraly kelisimge keldi. Atalǵan jaýyngerlik modýlderdi «Qazaqstan Paramaýnt Injınırıng» JShS shyǵaratyn brondy dóńgelekti mashınalarǵa ornatý kózdelip otyr. Modýlderdi jasaý jumysy bıyldan bastalyp ketpek.

Belgili bolyp otyrǵandaı, «Qazaqstan Paramaýnt Injınırıng» JShS men «Býrevestnık» Ortalyq ǵylymı-zertteý ınstıtýty elordada ótken «KADEX» kórmesinde «AÝ-220M» modýlinde avtomatty zeńbiregi (pýshkasy) 57-mm bolatyn «Barys 8h8» BTR-in tanystyrǵan. Sonymen birge, «Batys Qazaqstan kólikquraý kompanııasy» AQ eki jyldan astam ýaqyt «Arlan» brondy mashınasy úshin 12-mm-lik zeńbirekterdi jasap keledi.