Qazaqstan Paralımpıadalyq quramasy IWAS-2013 Búkilálemdik oıyndarynyń ekinshi kúninde 11 medal ıelendi
ASTANA. 20 qyrkúıek. QazAqparat - Gollandııanyń Stadskanaal qalasynda ótip jatqan IWAS-2013 Búkilálemdik oıyndarynyń ekinshi kúninde Qazaqstan paralımpıadalyq quramasy 11 medalǵa qol jetkizdi.
Bul týraly Qazaqstan Respýblıkasynyń Ulttyq paralımpıadalyq komıtetiniń baspasóz habarlamasynda aıtyldy.
Altyn alǵandar: Mıhaıl Eremenko (júzý, 50 m., batterflıaı), Rýslan Ótebalıev (júzý, 100 m., arqamen júzý), Vladımır Erman (júzý, 100 m., erkin stıl), Oksana Mıtıakova (júzý, 50 m., batterflıaı).
Álemdik reıtıngide úzdik segizdiktiń qataryna kiretin Zýlfııa Ǵabıdýllına taǵy da eki altyn medaldy jeńip aldy (júzý: 150 m., keshendi júzý; 100 m., erkin stıl).
Alına Mıhaılova (júzý, 100 m., erkin stıl) ekinshi kúmis medalin alsa, al Dmıtrıı Lı (júzý, 100 m., erkin stıl) men Mıhaıl Eremenko (júzý, 100 m., arqada) kúmis medalǵa qol jetkizdi.
Qola medal Alına Mıhaılova (júzý, 100 m., arqamen júzý) men Amanat Qalqaevqa (uzyndyqqa sekirý) buıyrdy.
Jarysqa 35 elden 500-ge jýyq sportshy qatysýda. Qazaqstannan sporttyń úsh túri boıynsha 16 adam qatysyp (1 - sadaqpen atý, 6 - jeńil atletıka, 9 - júzý) otyrǵandyǵyn esterińizge salamyz.
Jarystyń birinshi kúni qazaqstandyq paralımpıadalyqtar qorjynǵa 10 medal salǵan bolatyn: 5 altyn, 2 kúmis jáne 3 qola. Qazaqstan Respýblıkasynyń Ulttyq paralımpıadalyq quramasy jalpy sany 21 medalǵa qol jetkizdi - bul elimizdiń paralımpıadalyq sport tarıhyndaǵy rekordtyq meje.
Qazaqstandyq komandanyń qatysýy Qazaqstan Respýblıkasynyń Ulttyq paralımpıadalyq komıtetiniń uıymdastyrýshylyq qoldaýy arqasynda ótýde, demeýshi "Samuryq-Qazyna" ulttyq ál-aýqat qory bolyp tabylady.
