Qazaqstan para voleıbolshylary asa tartysty oıynda Paralımpıada chempıonyna jol berdi

PARIJ. KAZINFORM – Parıj qalasynda XVII Jazǵy Paralımpıada oıyndarynda voleıboldy otyryp oınaýdan Qazaqstan ulttyq quramasy ekinshi matchyn ótkizdi. 

Bul joly 12 jyldan beri quramany jattyqtyryp kele jatqan Baýyrjan Tahaýov shákirtterine Paralımpıada oıyndarynyń úsh dúrkin jeńimpazy, budan buryn Tokıoda qola alǵan Bosnııa jáne Gertsegovına quramasy tap keldi.

Birinshi partııada qazaqstandyqtar qarsylasyn tórt upaı aıyrmashylyǵymen alǵa jiberip alǵanymen, shabýylshy Perdebaı Namuratov, komanda kapıtany Baýyrjan Sartaev, Nurtaı Muhambetqalıev, Erbolat Altaev, Erik Qasqabaev, 18 jastaǵy Erasyl Ábdibek sııaqty jigitterdiń kúshimen qýyp jetti. Tipti 23:21 esebimen alda turdy. Alaıda set sońynda sátti oınaı almady – 24:26.

Ekinshi sette quramynda tisqaqqan, ataqty oıynshylary kóp bosnııalyqtar 11:5 esebimen alǵa ketti. Olar sol qarqynyn joǵaltqan joq – 25:13.

Úshinshi kezeńdi serpindi bastaǵan qazaqstandyqtar 17:5 esebimen alǵa shyqty. Sol basymdylyqty jibergen joq – 25:14.

Tórtinshi partııa ortasyna taman Qazaqstan quramasy tarazy basyn teńestirdi – 11:11. Sodan soń bul kezeńdi óz paıdasyna sheshti – 25:20. 

Sheshýshi, besinshi kezeńde bosnııalyqtar 5:1 esebimen alǵa ketkennen keıin Qazaqstan quramasy úzilis aldy. Esep sál qysqardy – 3:5. Biraq bosnııalyqtar kúsh alyp ketti – 15:8. Qorytyndy esep: 3:2, Bosnııa jáne Gertsegovına paıdasynda. Degenmen bul oıynda qazaqstandyqtar bir upaı enshiledi. 

Araǵa 28 jyl salyp, Paralımpıada oıyndaryna qatysyp jatqan Qazaqstan endi 2 qyrkúıekte Mysyr quramasymen synǵa túsedi. Ár toptan eki úzdik komanda jartylaı fınalǵa shyǵatynyn eskersek, áli múmkindik bar.

Eske sala keteıik, budan buryn Oralda paravoleıboldan Qazaqstan chempıonaty men kýbok oıyndary máresine jetkenin jazǵan edik.

Sondaı-aq Qazaqstan voleıbol quramasy Paralımpıadany jeńispen bastaǵanyn habarlaǵan bolatynbyz.