Qazaqstan para-karate komandasy Azııa chempıonatynda jalpy esepte top jardy
ASTANA. KAZINFORM - Búgin Indonezııanyń Balı qalasynda WKF nusqasy boıynsha para-karateden V Azııa chempıonaty ótti, dep habarlaıdy Qazaqstan karate federatsııasynyń baspasóz qyzmeti.
Bıylǵy jarysqa 7 memleketten úzdik sportshylar qatysyp, qurlyq myqtylaryn anyqtady.
Qazaqstan komandasy joǵary daıarlyq úlgisin kórsetip, jalpykomandalyq esepte 1-oryn ıelendi. Sportshylar birneshe altyn jáne qola medal jeńip alyp, el namysyn abyroımen qorǵady.
Jeńimpazdar men júldegerler:
🥇Lázzat Júsipova – altyn medal
🥇Nazgúl Іzmaǵambetova – altyn medal
🥇Nurjaına Jannetova – altyn medal
🥉Rýstam Bılıalov – qola medal
🥉Azıza Ibraımova – qola medal
🥉Erlan Nurmaǵambetov – qola medal
Eske sala keteıik, byltyr Tashkent qalasy qabyldaǵan para-karateden Azııa chempıonatynda bizdiń komanda 2 altyn, 1 kúmis, 4 qola medal ıelengen edi.
Sondaı-aq qazaqstandyq úsh karateshiniń álemdik reıtıngide kósh bastaǵany týraly jazdyq.
