Qazaqstan Palestınaǵa medıtsınalyq kómek kórsetti
AMMAN. QazAqparat – Palestına eliniń Densaýlyq saqtaý mınıstrligi Qazaqstannan medıtsınalyq kómek aldy, dep habarlaıdy QazAqparat vedomstvonyń baspasóz qyzmetine silteme jasap.
Palestınanyń Densaýlyq saqtaý mınıstrligi osy aptada Qazaqstannan Ramalla qalasyna kelip jetken gýmanıtarlyq kómek partııasyn alǵanyn rastady. Bul týraly Palestınanyń densaýlyq saqtaý mınıstri Maı ál-Kalla málimdedi.
Ol Qazaqstan Úkimetine COVID-19 pandemııasymen kúres júrgizýge septigin tıgizetin kómegi úshin alǵysyn bildirdi. Palestınalyq tarapqa jiberilgen júk Qazaqstannyń Azııadaǵy ózara is-qımyl jáne senim sharalary jónindegi Keńeske tóraǵalyq etýiniń aıasynda kórsetilgenin atap ótý kerek. Palestınadan bólek, Irak pen Aýǵanstan elderine kómek kórsetilgen. Demeýshisi - «HALYK» qaıyrymdylyq qory.
Syrtqy ister mınıstriniń birinshi orynbasary Shahrat Nuryshevtiń buǵan deıin atap ótkenindeı, Qazaqstan dostastyq elderine Azııadaǵy ózara is-qımyl jáne senim sharalary jónindegi Keńes «Epıdemıologııalyq qaýipsizdik, qoǵam densaýlyǵyn saqtaý jáne farmatsevtıka» jańa senim sharasy aıasynda bólgen.
«Bul halyqaralyq qaýymdastyqtaǵy ózara qoldaýdyń erekshe qajettiligin tanytyp otyr», - dep atap ótti Sh.Nuryshev.
AÓSShK – bul Azııa memleketterinde beıbitshilik, turaqtylyq jáne qaýipsizdikti qamtamasyz etý maqsatynda ózara qatynastar men aımaqtyq yntymaqtastyqty nyǵaıtýǵa baǵyttalǵan halyqaralyq forým. Búginde onyń quramyna 27 múshe memleket kirip otyr. Ótken jyldyń qyrkúıek aıynda Qazaqstan uıymnyń tóraǵasy bolyp saılandy.
Avtor: Arsen Óteshov
