Qazaqstan Palestına Memleketi Elshiliginiń muqtajdyqtaryn óteýge baǵyttalǵan kelisimdi qabyldady
ANA. 10 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń Úkimeti men Palestına Memleketi Úkimeti arasyndaǵy Palestına Memleketiniń Qazaqstan Respýblıkasyndaǵy Elshiliginiń muqtajdyqtary úshin Astana qalasyndaǵy ofıstik úı-jaıdy óteýsiz paıdalanýǵa berý týraly kelisimdi ratıfıkatsııalaý týraly» QR Zańy qabyldandy.
Endi qujat Memleket basshysynyń qol qoıýyna jiberiledi.
Atalǵan kelisimniń maqsaty - eki el arasyndaǵy dástúrli dostastyq qarym-qatynastardy nyǵaıtý, sondaı-aq Palestına Memleketi Elshiliginiń elimizde bolýyna jáne jumys isteýine tıisti jaǵdaılar jasaýdy qamtamasyz etý bolyp tabylady. Soǵan oraı Qazaqstan taraby Astana qalasynda ornalasqan ofıstik úı-jaıdy jáne onyń irgeles aýmaqtaryn Palestına Memleketiniń elshiligine 3 jyl merzimge óteýsiz paıdalanýǵa beredi.
Sondaı-aq, kelisimge sáıkes atalǵan úı-jaı elimizde alynatyn salyqtar men alymdardyń barlyq túrlerinen bosatylady. «Kelisim Palestına tarapynyń muqtajdyqtaryn óteý jáne ótinishterin qanaǵattandyrý úshin jasalǵan. Bul óz kezeginde Qazaqstan men Palestına arasyndaǵy qalyptasqan dıplomatııalyq qarym-qatynasty odan ári jetildiredi. Sonymen qatar kelesi jyly elimizdiń Islam Konferentsııasy Uıymyna tóraǵalyq tizginin alar tusta, palestınalyqtarǵa qoldaý kórsetýdiń mańyzy da ereksh», dedi zań boıynsha baıandaǵan senator Ádil Ahmetov.
Kelisim 2010 jylǵy 16 qyrkúıekte Astana qalasynda jasalǵan.
