Qazaqstan Pákistanǵa, un, et ónimderi men ósimdik maıy esportyn ulǵaıtýǵa múddeli
ASTANA. KAZINFORM – Bul týraly Aýyl sharýashylyǵy vıtse-mınıstri Azat Sultanovtyń Pákistan Islam Respýblıkasynyń Ulttyq azyq-túlik qaýipsizdigi jáne zertteýler jónindegi federaldy mınıstri Rana Tanvır Hýsseınmen bolǵan kezdesýi barysynda málim boldy.
Rana Tanvır Hýsseınmen ótken kezdesýde aýyl sharýashylyǵy salasyndaǵy yntymaqtastyq Qazaqstan men Pákistan arasyndaǵy ekijaqty qatynastardyń mańyzdy quramdas bóligi ekeni atap ótildi. Ózara is-qımyldyń negizgi baǵyttarynyń biri — agroónerkásiptik keshen ónimderiniń ózara tıimdi saýdasyn damytý.
2025 jyldyń 11 aıynyń qorytyndysy boıynsha eki el arasyndaǵy AÓK ónimderiniń taýar aınalymy 5%-ǵa artty. Qazirgi ýaqytta Qazaqstan Pákistanǵa negizinen keptirilgen burshaq tuqymdas daqyldardy, zyǵyr tuqymyn, qaraqumyqty, sulyny jáne ózge de aýyl sharýashylyǵy ónimderin eksporttaıdy.
- Aýyl sharýashylyǵy ónimderiniń ózara saýdasyn arttyrý jáne ártaraptandyrý úshin áleýetimiz joǵary. Biz dándi-burshaq jáne maıly daqyldar, kondıterlik jáne un ónimderi, qoı jáne sıyr eti, et ónimderi, sondaı-aq ósimdik maıy eksportynyń kólemin ulǵaıtýǵa múddelimiz, — dedi vıtse-mınıstr.
Sondaı-aq aýyl sharýashylyǵy salasyndaǵy qazaqstan-pákistandyq Jumys tobynyń tabysty qyzmet atqaryp otyrǵany atap ótildi. Atalǵan alań aıasynda búgingi kúnge deıin eki otyrys ótkizilgen.
Ekinshi otyrys barysynda taraptar Pákistan naryǵyna astyq eksporttaý múmkindikterin talqylady. Pákistanda 2025/26 marketıngtik jyly bıdaı ımporty 1,5 mln tonnaǵa deıin ósedi degen boljamdy eskere otyryp, taraptar bul baǵyttaǵy jumysty jalǵastyrýǵa ýaǵdalasty.
Kezdesý qorytyndysynda Azat Sultanov qol jetkizilgen kelisimder agrarlyq saladaǵy ekijaqty yntymaqtastyqty damytýǵa jáne ózara saýdany keńeıtýge qosymsha serpin beredi degen senim bildirdi.
Aıta keteıik, aýyl sharýashylyǵy vıtse-mınıstri Azat Sultanov Berlın qalasynda ótip jatqan Azyq-túlik jáne aýyl sharýashylyǵy jónindegi 18-shi Jahandyq forým (Global Forum for Food and Agriculture, GFFA) aıasynda uıymdastyrylǵan Aýyl sharýashylyǵy mınıstrleriniń halyqaralyq konferentsııasyna qatysyp jatyr.
Forým aıasynda Azat Sultanov birqatar ekijaqty kezdesýler ótkizdi. Pákistan Islam Respýblıkasynyń Ulttyq azyq-túlik qaýipsizdigi jáne zertteýler jónindegi federaldy mınıstri Rana Tanvır Hýsseınmen kezdesý osy sharaaıasynda ótti.
Mınıstrdiń orynbasary sonymen qatar jıyn barysyndaq CLAAS kompanııasynyń Shyǵys Eýropa jáne Ortalyq Azııa óńiri boıynsha vıtse-prezıdenti Mıhael Baıermen kezdesti.
Vıtse-mınıstr halyqaralyq Grüne Woche agroónerkásiptik kórmesiniń ashylý rásimine jáne Munich Security Conference aıasynda ótken joǵary deńgeıdegi paneldik sessııaǵa qatysty.
Osyǵan deıin Qazaqstan men Pákistan qylmysqa qarsy kúrestegi yntymaqtastyqty kúsheıtkeli otyrǵany týraly jazdyq.