Qazaqstan Pákistanǵa astyq tasymaldaýǵa nıetti
ISLAMABAD. KAZINFORM – QR Premer-mınıstriniń orynbasary – Syrtqy ister mınıstri Murat Nurtileýdiń Islamabadqa resmı saparynda aýyl sharýashylyǵy jónindegi birlesken jumys tobynyń alǵashqy otyrysy ótti. Onda taraptar agroónerkásiptik saladaǵy ekijaqty yntymaqtastyqtyń qazirgi jaǵdaıy men damý perspektıvalaryn talqylady.
2025 jyldyń 7 aıynyń qorytyndysy boıynsha Qazaqstan men Pákistan arasyndaǵy agrarlyq taýar aınalymy 22%-ǵa ósip, 19,4 mln AQSh dollaryn quraǵan. Qazaqstannan Pákistanǵa negizinen keptirilgen burshaq daqyldary, zyǵyr tuqymy, qaraqumyq jáne basqa da ónimder eksporttalady.
– Pákistanmen aýyl sharýashylyǵy salasyndaǵy ózara is-qımyl – ekijaqty qatynastardyń mańyzdy baǵyty jáne aýyl sharýashylyǵy ónimderi saýdasynda oń serpin baıqalady. Eki el arasyndaǵy agrarlyq saýdany odan ári ósirýge jáne ártaraptandyrýǵa aıtarlyqtaı áleýet bar. Qazaqstan burshaq jáne maıly daqyldar, ósimdik maılary, kondıterlik jáne un ónimderi, sondaı-aq et pen et ónimderi eksportyn keńeıtýge múddeli, - dedi QR Aýyl sharýashylyǵy vıtse-mınıstri Ermek Kenjehanuly.
Ásirese qazaqstandyq astyqty jetkizý múmkindikterine, sonyń ishinde B2B formaty boıynsha eksportqa erekshe nazar aýdaryldy. Qazaqstan tarapynan jetkizý operatory retinde «Azyq-túlik kelisimshart korporatsııasy» AQ áreket ete alady, kompanııa pákistandyq áriptesterge óziniń eksporttyq áleýetin tanystyrdy.
Sonymen birge, jahandyq klımattyq ózgerister boıynsha agrarlyq ǵylym men zamanaýı bıotehnologııalar salasynda birlesip jumys isteý mańyzdylyǵy atap ótildi.
Otyrysta qazaqstandyq vıtse-mınıstr Pákistannyń Azyq-túlik qaýipsizdigi jáne zertteýler mınıstrliginiń ókilderimen kezdesti jáne birqatar baǵyttar boıynsha ýaǵdalastyqqa qol jetkizildi. Olardyń qatarynda Pákistanǵa azyq-túlik bıdaıyn, maıly daqyldar men kúnbaǵys maıyn jetkizý, aýyl sharýashylyǵy ónimderin óndirý jáne qaıta óńdeý boıynsha birlesken ınvestıtsııalyq jobalardy damytý, qazaqstandyq agrarlyq ónimniń eksporttyq geografııasyn keńeıtý, sondaı-aq AÓK salasyndaǵy ǵylymı-zertteý jáne bilim berý baǵytynda yntymaqtastyqty tereńdetý bar.
Otyrys qorytyndysy boıynsha QR Aýyl sharýashylyǵy mınıstrligi men Pákistan Islam Respýblıkasynyń Azyq-túlik qaýipsizdigi mınıstrligi arasyndaǵy ózara is-qımyl týraly hattamaǵa qol qoıyldy.
Eske sala ketsek, QR Premer-Mınıstriniń orynbasary – Syrtqy ister mınıstri Murat Nurtileý Pákistan astanasy Islamabad qalasyna resmı saparmen bardy.
Pákistandyq kásipkerler Qazaqstannyń Ortalyq Azııaǵa, Reseıge, Eýropaǵa jáne Qytaıǵa jol ashatyn mańyzdy qaqpa ekenin atap ótti. Óz kezeginde Pákistan Afrıkamen, Taıaý Shyǵys pen Ońtústik-Shyǵys Azııamen jerústi saýdasyna jol ashady.
QR Syrtqy ister mınıstrligi Investıtsııa komıteti tóraǵasy Ǵabıdolla Ospanqulov Qazaqstan men Pákistan arasynda ınvestıtsııalyq qatynastardyń qaı baǵytta órbıtinin aıtyp berdi.