Qazaqstan Pákistanǵa 600 elektr avtobýsyn jetkizedi

ASTANA. KAZINFORM – Qazaqstandyq Falcon EuroBus kompanııasy Pákistanǵa 600 dana elektr avtobýsyn jetkizbek. Bul týraly Islamabadta ótip jatqan «Qazaqstan-Pákistan» bıznes forýmynda eki eldiń bıznes taraptary kelisimge keldi. 

QR Saýda jáne ıntegratsııa mınıstrliginiń málimetinshe, avtobýstardyń alǵashqy jetkizilimi bıyl sáýirde bastalady. Kommertsııalyq kelisimniń quny 108 mln AQSh dollaryn quraıdy. 2027-2028 jylǵa qaraı kompanııa Pákistan avtobýs eksportyn 2000 danaǵa jetkizýge nıetti. 

2018 jyly Almaty qalasynda qurylǵan kásiporyn búginde eýropalyq standartqa saı avtobýstardyń keń túrin shyǵarady. Jylyna 1 500 dana avtobýs shyǵaratyn kásiporyn bıyl óndiris qýatyn 3 000 danaǵa jetkizýdi kózdep otyr. Óıtkeni qazaqstandyq elektr avtobýsyna kórshiles Ózbekstan, Mańǵolııa, Pákistanda ǵana emes, eýropa elderinen de suranys joǵary.

– Biz barlyq tsıkldegi avtobýstardy shyǵaramyz. Búgingi «Qazaqstan-Pákistan» bıznes forýmy aıasynda biz úshin úlken naryqtyń esigi ashyldy. Qazirgi kelisim boıynsha jolaýshylar tasymalyna arnalǵan 600 elektr avtobýsyn jetkizemiz. B2B kezdesýde Pákistannyń bilim mınıstriginiń ókilderimen kezdesip, aldaǵy ýaqytta oqýshylar tasymalyna arnalǵan 2 000 dana avtobýs jetkizýge kelisip otyrmyz, - dedi Falcon EuroBus dırektorlar keńesiniń tóraǵasy Murat Ádilhanov.

Bıznes forým qorytyndysy boıynsha Falcon EuroBus pen transport salasyna mamandanǵan pákistandyq «OGCC International» kompanııalary arasynda kommertsııalyq qujatqa qol qoıylmaq.

Aıta ketý kerek, «Qazaqstan-Pákistan» bıznes forýmy QR Prezıdenti Qasym-Jomart Toqaevtyń Pákistan Islam Respýblıkasyna memlekettik sapary aıasynda uıymdastyrylyp jatyr. 

Buǵan deıin Pákistanda Prezıdent Qasym-Jomart Toqaevty resmı qarsy alý rásimi ótkenin jazǵan edik.