Qazaqstan Pákistandy dostas el jáne strategııalyq seriktes dep sanaıdy - Prezıdent
ASTANA. KAZINFORM - Qazaqstan Prezıdenti Qasym-Jomart Toqaev Pákistannyń The News International gazetine suhbat berdi.
– Qazaqstan Pákistandy dostas el jáne halyqaralyq qoǵamdastyqta bedeli bıik strategııalyq seriktes retinde qarastyrady. 1992 jyly dıplomatııalyq qatynas ornaǵan sátten beri ortaq múddemizge saı keletin birqatar másele men jobalar boıynsha tabysty áreket etip kelemiz. Memleketterimiz ShYU, IYU, AÓSShK sekildi mańyzdy halyqaralyq uıymdar aıasynda tyǵyz ári jemisti yqpaldastyqty jolǵa qoıdy. Osylaısha, biz jahandaǵy beıbitshilik pen turaqtylyqty nyǵaıtýǵa, sondaı-aq ornyqty damýǵa úles qosamyz. Pákistanǵa alǵashqy memlekettik saparym seriktestik kókjıegin keńeıtip, ózara baılanys tarıhynyń jańa kezeńine bastaý bolady, - dedi Qasym-Jomart Toqaev.
Osy oraıda Prezıdent Sapar barysynda qol qoıylǵan 60-tan astam úkimetaralyq jáne iskerlik kelisim ekijaqty yntymaqtastyqqa zor serpin beretinin aıtty. Kólik-logıstıka, aýyl sharýashylyǵy, ónerkásip pen óndiris, densaýlyq saqtaý, bilim berý jáne basqa da sektorlar ekonomıkalyq yntymaqtastyǵymyzdyń basym baǵyttary sanalady.
- Men eki eldiń kompanııalary birlesken kásiporyndar quryp, tıimdi jobalardy júzege asyra alady dep oılaımyn. Oǵan múmkindik mol. Biz ózara saýda-sattyǵymyzdy keńeıtýge erekshe nazar aýdaryp otyrmyz, - dedi Memleket basshysy.
Budan buryn habarlanǵandaı, Prezıdent Qasym-Jomart Toqaev Pákistanǵa memlekettik saparmen bardy.