Qazaqstan Pákistandaǵy bilim berý jobalaryna 1 mln dollar grant bóldi
ASTANA. KAZINFORM – Qazaqstan Úkimeti Pákistannyń Bilim berý granttary qoryna (Pakistan Education Endowment Fund, PAK-EEF) 1 mln AQSh dollary kóleminde grant bóldi, dep habarlaıdy QR Syrtqy ister mınıstrligi.
Qazaqstannyń Pákistandaǵy Elshisi Erjan Qystafın atalǵan grantty tabystaýǵa arnalǵan saltanatty rásimge qatysty.
Іs-sharaǵa Pákistannyń Federaldyq bilim jáne kásiptik daıarlyq jónindegi memlekettik mınıstri Vadjıha Kamar, eldiń Syrtqy ister mınıstrligi, Bilim mınıstrligi jáne basqa da memlekettik organdarynyń ókilderi qatysty.
– Kórsetilgen qoldaý úshin Qazaqstan basshylyǵyna alǵys bildiremiz. QR joǵary oqý oryndarymen birlesip bilim berý salasynda birqatar jobalardy iske asyrý josparlanyp otyr, – dedi PAK-EEF qorynyń bas atqarýshy dırektory S.Sýhaıl.
Atalǵan jobalar aıasynda pákistandyq stýdentterdi oqytý jáne olardyń biliktiligin arttyrý, sondaı-aq Qazaqstan men Pákistan joǵary oqý oryndary arasyndaǵy yntymaqtastyqty damytý kózdelgen.
Erjan Qystafın Qazaqstannyń bilim berý, akademııalyq almasý, kadr daıarlaý jáne adamı kapıtaldy damytý baǵyttarynda Pákistanmen yntymaqtastyqty keńeıtýge daıyn ekenin atap ótti.
– Bilim berý salasyna salynǵan ınvestıtsııalar Qazaqstan men Pákistan halyqtarynyń ortaq beıbit, ornyqty ári gúldengen bolashaǵyna qosylǵan mańyzdy úles, – dedi elshi.
Óz kezeginde Vadjıha Kamar Qazaqstan halqyna alǵys aıtyp, aldaǵy bastamalardy talqylaý jáne olardy iske asyrý jónindegi jol kartasyn ázirleý úshin Astanaǵa delegatsııa jiberý nıetin jetkizdi.
Іs-shara qorytyndysy boıynsha taraptar eki eldiń qorlary men jetekshi joǵary oqý oryndary arasynda kelissózder uıymdastyrýǵa ýaǵdalasty.
Aıta keteıik, 489 pedagogıkalyq grant qandastarǵa bólindi.
