Qazaqstan Pákistan porttaryna shyǵatyn jańa temirjol baǵytyn damytýǵa qatysady
ASTANA. KAZINFORM — Qazaqstan, Ózbekstan jáne BAÁ Aýǵanstan arqyly Pákistannyń teńiz porttaryna shyǵatyn jańa temirjol baǵytyn damytý jóninde memorandýmǵa qol qoıdy. Bul týraly Úkimettiń baspasóz qyzmeti málim etti.
Qazaqstan, Ózbekstan jáne Birikken Arab Ámirlikteri Qazaqstan — Ózbekstan — Aýǵanstan — Pákistan (CASA) baǵyty boıynsha Pákistannyń teńiz porttaryna shyǵatyn jańa temirjol baǵytynyń jobasyn birlesip pysyqtaýdy kózdep otyr.
CASA temirjol jobasy aıasyndaǵy yntymaqtastyq týraly Memorandýmǵa Qazaqstan Respýblıkasynyń Kólik mınıstrligi, Ózbekstan Respýblıkasynyń Kólik mınıstrligi jáne Birikken Arab Ámirlikteriniń Energetıka jáne ınfraqurylym mınıstrligi qol qoıdy.
CASA jobasy Ortalyq jáne Ońtústik Azııanyń kólik baılanysyn qamtamasyz etýge baǵyttalǵan jańa temirjol baǵytyn qalyptastyrýdy, sondaı-aq halyqaralyq tasymaldardy, saýda, logıstıka jáne ınvestıtsııalyq yntymaqtastyqty damytý úshin qosymsha múmkindikter ashýdy kózdeıdi.
— Memorandým aıasynda taraptar tehnıkalyq, ekonomıkalyq zertteýler men taldaý jumystaryn júrgizýdi, qajetti temirjol ınfraqurylymyn jáne onymen baılanysty nysandardy damytýdyń oryndylyǵyn zerdeleýdi kózdeıdi, — delingen habarlamada.
Qazaqstan men Ózbekstannyń damyǵan temirjol ınfraqurylymy jáne aıtarlyqtaı tranzıttik áleýeti bar. Birikken Arab Ámirlikteri kólik ınfraqurylymy, logıstıka jáne iri ınvestıtsııalyq jobalardy iske asyrý salasynda halyqaralyq tájirıbege ıe.
Osylaısha taraptardyń yntymaqtastyǵy CASA jobasyn jan-jaqty pysyqtaýǵa jáne ony iske asyrýdyń ońtaıly tetikterin aıqyndaýǵa múmkindik beredi.
Taraptar odan ári atqarylatyn qadamdar men birlesken jumystyń naqty baǵyttaryn da talqylady.
Atap aıtqanda, jobanyń tehnıkalyq, ekonomıkalyq jáne qarjylyq máselelerin keshendi túrde pysyqtaý úshin Jumys tobyn qurý múmkindigi qarastyrylyp otyr.
Buǵan deıin Úkimette 9 aıdaǵy ekonomıka damýynyń aldyn ala qorytyndysy qaralǵanyn jazdyq.
