Qazaqstan-Pákistan kólik-logıstıkalyq konsortsıýmyn qurý usynyldy
ISLAMABAD. KAZINFORM — QR Premer-mınıstriniń orynbasary – Syrtqy ister mınıstri Murat Nurtileýdiń Pákistanǵa resmı saparynda Qazaqstan-Pákistan kólik-logıstıkalyq konsortsıýmyn qurý bastamasy kóterildi.
Qazaq delegatsııasy ekonomıkanyń negizgi salalaryndaǵy jetekshi pákistandyq kompanııalardyń basshylyǵymen kezdesti. Delegatsııa quramyna quramyna Saýda jáne ıntegratsııa mınıstri Arman Shaqqalıev, Kólik mınıstri Nurlan Saýranbaev, sondaı-aq elimizdiń ózge de memlekettik jáne kvazımemlekettik organdarynyń ókilderi kirdi.
– «National Logistics Corporation» bas dırektory Farrýh Shahzadpen ótken kezdesýde taraptar logıstıka salasyndaǵy yntymaqtastyqty damytýǵa baǵyttalǵan sharalardy aıqyndady. Qazaq delegatsııasy eki eldiń iri operatorlarynyń qatysýymen birlesken Qazaqstan-Pákistan kólik-logıstıkalyq konsortsıýmyn qurý bastamasyn usyndy. Ony iske asyrý qoldanystaǵy áleýetti neǵurlym tıimdi paıdalaný jáne ózara jetkizilimderdi keńeıtý úshin kúsh jumyldyrýǵa múmkindik beredi, – dep jazylǵan QR Syrtqy ister mınıstrliginiń baspasóz relızinde.
Sonymen birge, «Fauji Foundation» bas dırektory Anvar Alı Haıdermen ótken kezdesýde qordyń enshiles kásiporyndary – «Fauji Fertilizer», «Mari Energies», «Askari Bank» jáne «Fauji Food» kompanııalarymen birlesken jobalardy júzege asyrý talqylandy. Ásirese aýyl sharýashylyǵy, mıneraldy tyńaıtqyshtar óndirisi, azyq-túlik pen qurylys materıaldaryn shyǵarý salalarynda yntymaqtastyqty keńeıtý, sondaı-aq Qazaqstan men Pákistan arasyndaǵy bank salasyndaǵy baılanysty nyǵaıtý múmkindikteri qarastyryldy.
Atalǵan josparlardy iske asyrý úshin «Fauji Foundation» qory men «Samuryq-Qazyna» AQ arasyndaǵy baılanystardy jandandyrý, sondaı-aq qazirgi múmkindikterdi zerdeleý jáne yntymaqtastyqty kezeń-kezeńimen júzege asyrý josparyn ázirleý maqsatynda ózara saparlar uıymdastyrý týraly kelisimge qol jetkizildi.
Sonymen birge, «TCS Logistics» kompanııasynyń tóraǵasy Halıd Navaz Avanmen kezdesýde Qazaqstanda aýqymdy ınfraqurylymdyq jobalarǵa qatysý múmkindikteri qarastyryldy.
Mınıstr QR Prezıdenti Qasym-Jomart Toqaevtyń tapsyrmasy boıynsha kólik-logıstıkalyq ınfraqurylymdy damytý strategııalyq basymdyq retinde aıqyndalǵanyn atap ótti. Negizgi bastamalardyń qatarynda Eýrazııa men Ortalyq Azııa naryqtaryn Pákistanmen baılanystyryp, Parsy shyǵanaǵy, Afrıka jáne Ońtústik Shyǵys Azııa elderine shyǵýǵa múmkindik beretin Aýǵanstan arqyly ótetin temir jol qurylysy da bar.
Eske sala ketsek, QR Premer-Mınıstriniń orynbasary — Syrtqy ister mınıstri Murat Nurtileý Pákistan astanasy Islamabad qalasyna resmı saparmen bardy.
Pákistandyq kásipkerler Qazaqstannyń Ortalyq Azııaǵa, Reseıge, Eýropaǵa jáne Qytaıǵa jol ashatyn mańyzdy qaqpa ekenin atap ótti. Óz kezeginde Pákistan Afrıkamen, Taıaý Shyǵys pen Ońtústik-Shyǵys Azııamen jerústi saýdasyna jol ashady.