«Qazaqstan – Pákistan» bıznes-forýmynda quny 200 mln dollarǵa jýyq 32 kommertsııalyq qujatqa qol qoıyldy
ASTANA. KAZINFORM - Bıznes-forým alańynda barlyǵy 32 kommertsııalyq qujat rásimdeldi. Qol qoıylǵan kelisimder qarjy, logıstıka, ónerkásip, energetıka, agroónerkásip kesheni, tsıfrlyq servıster men ınfraqurylym salalaryndaǵy qazaqstandyq-pákistandyq yntymaqtastyqty damytý men tereńdetýge baǵyttalǵan.
QR Saýda jáne ıntegratsııa mınıstrligi baspasóz qyzmetiniń habarlaýynsha, sapar aıasyndaǵy eń iri ónerkásiptik kelisim – qazaqstandyq Falcon EuroBus JShS men pákistandyq QCC International kompanııasy arasynda otandyq elektrobýstardy Pákistanǵa jetkizý týraly jasalǵan, quny 108 mln AQSh dollary bolatyn kelisimshart boldy.
Bul qujat ulttyq mashına jasaý salasyn ilgeriletý jáne halyqaralyq naryqtarda Made in Kazakhstan brendin nyǵaıtý turǵysynan strategııalyq mańyzǵa ıe. Sonymen qatar, eksporttyq ónim túrlerin keńeıtý men joǵary tehnologııalyq óndiristi odan ári jergiliktendirýge jańa múmkindikter ashady.
Kelisimderdiń eleýli bóligi birlesken ınvestıtsııalaý tetikterin iske qosýǵa jáne qarjylyq yntymaqtastyq ınfraqurylymyn damytýǵa arnaldy. Atap aıtqanda, «Samuryq-Qazyna» AQ men Fauji kompanııalar toby Qazaqstan men Pákistan aýmaǵynda jobalardy irikteý jáne iske asyrý úshin birlesken ınvestıtsııalyq platforma qurý jónindegi kelisimge keldi.
«Báıterek» UBH» AQ Habib Bank Limited arqyly jobalyq jáne saýda qarjylandyrý baǵytyndaǵy seriktestigin keńeıtip, kólik-logıstıka sektorynda TCS Private Limited kompanııasymen yntymaqtastyq ornatty.
Sondaı-aq Freedom Holding Corp. pen «Frıdom Bank Qazaqstan» AQ pákistandyq seriktestermen birqatar kelisimge qol qoıdy. Atap aıtqanda, Meezan Bank Limited-pen 20 mln AQSh dollary kóleminde korrespondenttik qatynastardy damytý jáne halyqaralyq esep aıyrysýlar jóninde kelisim jasaldy. Budan bólek, transshekaralyq qarjylyq jáne tsıfrlyq servısterdi damytýǵa baǵyttalǵan ýaǵdalastyqtar bekitildi.
Kelisimderdiń mańyzdy bóligi kólik-logıstıka sektoryna tıesili boldy. «Qazaqstan temir joly» UK» AQ pen National Logistics Corporation mýltımodaldy tasymaldar men tranzıt salasyndaǵy yntymaqtastyq týraly kelisti.
«Qazposhta» AQ Pakistan Post jáne TCS Private Limited kompanııalarymen poshta-logıstıkalyq ınfraqurylymdy damytý jáne tsıfrlyq sheshimderdi engizý jóninde memorandýmdarǵa qol qoıdy. Sonymen qatar, Aqtaý halyqaralyq teńiz saýda porty men Karachı porty porttyq logıstıkany damytý jáne ózara yqpaldastyqty keńeıtý týraly kelisimderge keldi.
Ónerkásip salasynda KazFoodProducts pen Almoiz Group arasynda Jetisý oblysynda qant óndiretin birlesken kásiporyn qurý jóninde 20 mln AQSh dollary kólemindegi ınvestıtsııamen kelisim jasaldy. Sondaı-aq Kusto Group pen QazTrade arasynda qurylys materıaldaryn óndirýdi damytýǵa baǵyttalǵan 20 mln AQSh dollary kólemindegi memorandýmǵa qol qoıyldy.
Hımııa jáne qaıta óńdeý ónerkásibinde BARK Qazaqstan JShS men pákistandyq beıindi qurylymdar arasynda kelisimder jasaldy. Sonymen qatar, Qyzylorda oblysynda hımııalyq óndiris iske qosý jóninde NorSon Chemical Industries men «Baıqońyr» ÁKK arasynda memorandýmǵa qol qoıyldy.
Tsıfrlyq servıster, IT jáne telekommýnıkatsııa salasyn qamtıtyn jeke kelisimder toptamasy da bar. Astana Hub pen IGNITE Pakistan startap-ekojúıelerdi damytý boıynsha yntymaqtastyq memorandýmyna qol qoıdy. QazCode pen Jazz Pakistan telekommýnıkatsııa sektoryndaǵy ózara is-qımyldy jolǵa qoıý jóninde ýaǵdalasty.
Budan bólek, tsıfrlyq sheshimder men jasandy ıntellekt salasynda, sondaı-aq tólem servısterin ıntegratsııalaý baǵytynda kelisimder jasaldy.
Bilim berý jáne medıtsına salalarynda Astana medıtsına ýnıversıteti men Maroof International Hospital, sondaı-aq iTech KZ pen Gift University arasynda yntymaqtastyqty keńeıtýge baǵyttalǵan memorandýmdarǵa qol qoıyldy.
Ǵarysh salasynda «Qazaqstan Ǵarysh Sapary» AQ men SUPARCO ǵylymı-tehnıkalyq yntymaqtastyq jáne spýtnıktik derekter almasý jóninde kelisimge keldi.
Sonymen qatar, Otbasy Bank pen Meezan Bank Limited arasynda ıslamdyq qarjylandyrý salasyndaǵy kelisimderge, sondaı-aq agroónerkásip keshenin damytý men eki eldiń saýda-ónerkásip uıymdary arasyndaǵy iskerlik baılanystardy nyǵaıtýǵa baǵyttalǵan memorandýmdarǵa qol qoıyldy.
Osyǵan deıin Prezıdent Qasym-Jomart Toqaev pen Premer-mınıstr Shahbaz Sharıf Qazaqstan Respýblıkasy men Pákistan Islam Respýblıkasy arasynda strategııalyq seriktestik ornatý týraly birlesken deklaratsııaǵa qol qoıǵany týraly jazǵan edik.