Qazaqstan óziniń energetıkalyq resýrstaryn eksporttaý baǵyttaryn ártaraptandyrýdy kózdeıdi — Toqaev
NЬıÝ-IORK. KAZINFORM — Memleket basshysy Qazaqstannyń óńirdegi ekonomıkasy eń qýatty el retinde Ortalyq Azııaǵa Amerıka bıznesiniń ınvestıtsııasyn tartý jáne olardyń kásip aıasyn keńeıtý isinde jetekshi ról atqarýǵa daıyn ekenin jetkizdi, dep habarlaıdy Aqordanyń baspasóz qyzmeti.
Bul baǵyttaǵy kúsh-jigerge S5+ jáne B5+ formatyndaǵy turaqty yntymaqtastyq tyń serpin bere alady. Prezıdent dóńgelek ústel qatysýshylaryna elimizde júzege asyrylyp jatqan ekonomıkalyq jáne saıası reformalar týraly málimet berdi.
— Qazaqstan bilim men ınnovatsııaǵa arqa súıegen ekonomıka qurýdy maqsat etedi. Bul rette tsıfrlyq transformatsııaǵa basa mán beriledi. Elimizdiń ekonomıkasy óńirdiń órkendeýinde negizgi ról atqarady. Qazaqstannyń mundaı bıikti baǵyndyrýyna Amerıka bıznesi aıtarlyqtaı úles qosty. Bıylǵy segiz aıdyń qorytyndysy boıynsha elimizdiń ekonomıkalyq ósimi 6,5 paıyzdy qurady. Biz damýdyń joǵary qarqynyn saqtaı otyryp, aýqymdy saıası-ekonomıkalyq reformalar júrgizýge nıettimiz, — dedi Qasym-Jomart Toqaev.
Memleket basshysy júzege asyrylyp jatqan jumystyń barlyǵy Qazaqstannyń tikeleı shetel ınvestıtsııasyna tartymdylyǵyn arttyrýdy kózdeıtinin aıtty. Sonymen qatar Qazaqstan men AQSh arasyndaǵy ekonomıkalyq jáne ınvestıtsııalyq yqpaldastyqtyń negizgi baǵyttaryna toqtaldy. Qasym-Jomart Toqaev burynnan ekijaqty yntymaqtastyqtyń negizi sanalatyn energetıka sektoryn alǵashqy basymdyq retinde atady.
— Chevron jáne ExxonMobil kompanııalarynyń sońǵy 30 jylda elimizge qomaqty ári tabysty ınvestıtsııa salǵanyn moıyndaımyz jáne joǵary baǵalaımyz. Aımaqtaǵy geosaıası dúrbeleńderge qaramastan, olardyń elimizdegi qyzmetine qatysty eshqashan kúmán týǵan emes. Elimizdiń ekonomıkasyn jańǵyrtýda, ozyq tehnologııalar engizýde, ekonomıkalyq áleýetimizdiń ornyqtylyǵy men qýatyn arttyrýda sizderdiń Qazaqstandaǵy qyzmetterińizdiń jaǵymdy áseri boldy. Biz Teńiz, Qashaǵan jáne Qarashyǵanaq munaı ken oryndaryndaǵy amerıkalyq seriktesterimizben konstrýktıvti yntymaqtastyqty odan ári jalǵastyramyz. Ózara seriktestigimiz aldaǵy ýaqytta da ádil ári eki tarapqa tıimdi nátıje ákelgenin qalaımyz. Qazaqstan óziniń energetıkalyq resýrstaryn eksporttaý baǵyttaryn ártaraptandyrýdy kózdeıdi, — dedi Qasym-Jomart Toqaev.
Aıta keteıik, budan buryn Prezıdent Amerıkanyń bıznes ókilderimen ótken «dóńgelek ústel» otyrysynda sóz sóılegenin jazǵan edik.