Qazaqstan óziniń tarıhı jerinde qazaq memlekettiligin jańǵyrtty - senator
«Táýelsizdik – el bıiktiginiń beınesi, alyptyǵymyzdyń aınasy, tatýlyǵymyzdyń tiregi. Ár jyly biz eń basty ulttyq merekemizdi ataı otyryp, osy bir kıeli qundylyǵymyzdyń táýelsiz memleket retinde órkendeýdegi orny men róline kóz jetkize túsemiz. Qazaqstan Respýblıkasy Tuńǵysh Prezıdenti - Elbasynyń: «Qazaqstannyń táýelsizdigi halqymyzǵa tartqan taǵdyrdyń syıy emes, óziniń ejelgi jerinde qıly kezeńdi bastan keshý arqyly qol jetken óz memlekettiligin qurýǵa degen zańdy quqyǵy. Bul daýsyz jáne saıası faktige eshkim kúmán keltirmeýi tıis», - dep atap kórsetýinde úlken maǵyna jatyr», - dedi senator.
Onyń atap ótýinshe, 29 jyl tarıh kózimen qaraǵanda shamaly ǵana merzim. Alaıda, osy kezeńde Elbasynyń sarabdal saıasatynyń nátıjesinde tarıhı sheshimder qabyldanyp, egemen eldiń irgetasy bekidi, aýqymdy reformalar júrgizildi.
Memlekettik shekaramyz bekemdelip, álem elderimen senimdi dostyq jáne yntymaqtastyq qarym-qatynas ornatyldy.
«Táýelsizdiktiń alǵashqy kúnderinen bastap elimizdiń saıasaty uzaq merzimge negizdeldi, qazaqstandyqtardyń ál-aýqaty, ómirdiń joǵary sapasyna júıeli de maqsatty umtylysy onyń basty ustanymdary retinde aıqyndalyp, sabaqtastyq taýyp keledi. Qazirgi Qazaqstan óziniń tarıhı jerinde jańa úlgidegi qazaq memlekettiligin jańǵyrtyp, əlemde tolyqqandy memleket retinde ómir súrýge qajetti barlyq qurylymdar men múmkindikterge ıe boldy. Osy áleýetimizdi tıimdi paıdalanyp, básekege qabiletti el ataný úshin búkil qoǵam bolyp bilim-biliktiligimizdi, kúsh-jigerimizdi ortaq maqsatqa jumyldyrýymyz qajet», - dedi ol.
Senator aıtýynsha, Táýelsizdiktiń ár jyly tarıhta óz erekshelikterimen qalady. Bıyl Uly Abaıdyń 175 jyldyq mereıtoıy, Ál-Farabıdiń 1150 jyldyǵy, Uly Otan soǵysyndaǵy Jeńistiń 75 jyldyǵy, Konstıtýtsııamyz ben Qazaqstan halqy Assambleıasynyń 25 jyldyǵy sııaqty aıtýly datalar atap ótildi.
«Keler jyl - Táýelsizdigimizge 30 jyl tolatyn merekelik jyl.
Memleket basshysy Qasym-Jomart Kemeluly Toqaev mereıtoı jylynda saıası jáne ekonomıkalyq reformalar odan ári jalǵasatynyn aıta kelip, tsıfrlandyrý, adam quqyqtaryn qorǵaý, densaýlyq saqtaý jáne bilim berýdi damytý, ekologııany qorǵaý aıasynda aýqymdy ister júzege asatynyn atap ótken bolatyn. Bul aıtýly beleske jańa jetistiktermen qadam basyp, táýelsiz elimizdiń damyp, órkendeýine barynsha atsalysyp, el rýhyn asqaqtata beremiz dep senemin», - dedi Dúısenǵazy Mýsın.
Al senator Qanatbek Safınov osy jyldyń jeltoqsan aıynyń basynda ótken UQShU Ujymdyq qaýipsizdik keńesiniń sessııasynda qatysýshy Memleket basshylary Qazaqstannyń Tuńǵysh Prezıdenti Nursultan Nazarbaevpen qurylǵan eldegi saıası turaqtylyq jaǵdaıyn úlken jetistik dep ataǵanyn jáne qazirgi Prezıdent Qasym-Jomart Toqaevpen tıimdi jalǵastyrylyp jatqanyn atap ótkendigin aıtady.
«Osyǵan oraı, men Qazaqstannyń jetistikteri dep tanylǵan jáne búginde álemde bolyp jatqan qubylystardyń aıasynda aıqyn bolyp otyrǵan nárselerdiń negizderin erekshe atap ótkim keledi. Qazaqstannyń ekonomıkalyq, saıası jáne áleýmettik salalardaǵy barlyq jetistikterin tek Mendeleev kestesinde bar tabıǵı resýrstarmen baılanystyryp jatady. Bul – qısynsyzdaý pikir. Shynynda da, Qazaqstannyń jer qoınaýynda munaı men gazdyń, kómir men ýrannyń, sırek kezdesetin metaldardyń jáne basqa paıdaly qazbalardyń mol qory saqtalǵan. Biraq tabıǵı resýrstardyń tek bar bolýy adamdardyń laıyqty jáne baqytty ómir súrýin qamtamasyz ete almaıdy. Eń bastysy – bul emes, ony durys basqaryp, qoldana bilý. Salystyrý úshin álemdegi munaı qorynyń 17,5 paıyzyn quraıtyn «qara altynnyń» shynymen de áserli qorynyń arqasynda Venesýela eń úlken munaı qoryna ıe delik. Alaıda, biz biletindeı, bul memleket birneshe jyldan beri tereń saıası daǵdarysty bastan keshirýde, halqy arasynda arazdyq paıda bolyp, ómir súrý deńgeıleri tómendep, mıllıondaǵan azamattary kórshi elderden pana tabýǵa májbúr bolýda», - dedi ol.
Senatordyń paıymynsha, mıneraldy resýrstar elimizdiń mańyzdy strategııalyq artyqshylyǵy bola otyryp, sonymen birge Qazaqstan jetistikteriniń birden-bir sebebi jáne kepili bola almaıdy. Jer qoınaýyn paıdalaný men qorǵaý salasyndaǵy saıasat memlekettiń jalpy saıasatynyń bir bóligi bolyp sanalady.
«Qazirgi kezeńdegi saıasattyń eń mańyzdy vektory – qoǵamdyq sanany jańǵyrtý. Aldyńǵy qatarly elderdiń tizimine kirý jolynda qoǵamdyq sanany ózgertýge kúsh salý mańyzdy. Meniń oıymsha, memlekettiń durys tańdalǵan saıasaty, quqyqtyq júıeniń negizderin, ishki jáne syrtqy saıasatty qalyptastyrý – bizdiń elimizdiń barlyq jetistikteriniń kilti bolyp tabylady jáne ýaqyttyń túrli syn-qaterlerine laıyqty jaýaptar berýge múmkindik beredi»,- dedi Qanatbek Safınov.
