Qazaqstan óziniń ShYU-daǵy tóraǵalyǵy kezindegi basymdyqtaryn atady
Dóńgelek ústel otyrysyna Qazaqstan men Qytaı mınıstrlikteriniń, vedomstvolarynyń joǵary deńgeıdegi ókilderi, Beıjińde tirkelgen ShYU-ǵa múshe memleketter elshilikteriniń elshileri men dıplomattary, QHR ǵylymı-zertteý ortalyqtarynyń basshylary jáne basqa da qytaılyq eksperttik qoǵamdastyqtardyń ókilderi qatysty.
Alqaly jıyndy ashqan ShYU Bas hatshysy R.Alımov táýelsizdik jyldary ishinde qazaqstandyq dıplomatııa Qazaqstan Prezıdenti Nursultan Nazarbaevtyń basshylyǵymen shyn máninde halyqaralyq tynys-tirshiliktiń barlyq salalaryn qamtıtyn ári eldiń álem men adamzattyń taǵdyry úshin shynaıy alańdaýshylyq bildiretin birqatar strategııalyq mańyzy bar bastamalardy júzege asyrǵandyǵyn basa atap ótti.
Onyń atap ótýinshe, Tashkent sammıtinen keıin ShYU-ǵa tóraǵalyq uıymnyń qurylýy bastaýynda turǵan jáne onyń damýyna mańyzdy ári zor úles qosqan Qazaqstan Respýblıkasyna kóshti. «ShYU-nyń onjyldyq mereıtoıyn qazaq elordasynda atap ótken sammıt jaıyndaǵy estelikter áli kúnge deıin jadymyzda», - dedi ol.
ShYU Bas hatshysy Qazaqstannyń ShYU-ǵa tóraǵalyǵynyń bastalýy respýblıkanyń 2017-2018 jyldary kezeńinde BUU Qaýipsizdik keńesiniń turaqty emes múshesi bolyp saılanýymen tuspa-tus kelýiniń nyshandyq máni bar ekendigin basa atap ótti. Sonymen qatar ol bul oqıǵanyń Qazaqstannyń halyqaralyq bedeli men qurmetiniń laıyqty deńgeıde moıyndalýy ári elimizdiń óńirlik jáne álemdik isterde belsendi róli bar ekendiginiń quptala túsýi ekendigin aıtty.
«Aldaǵy jyldar ishinde Qazaqstan Respýblıkasynyń ShYU-ǵa tóraǵalyqty odan ary arttyryp, uıymnyń jańa sapaǵa kóterilýin qamtamasyz etetindigine, bizdiń elderimizdiń gúldenýi men halyqtarymyzdyń ál-aýqatyn jaqsartý jolynda tyń qadamdarǵa baratyndyǵyna senimdimin», - dep málimdedi ShYU Bas hatshysy.
Osy rette Bas hatshynyń sózine qoldaý bildirgen Qazaqstannyń Qytaıdaǵy Tótenshe jáne Ókiletti Elshisi Sh.Nuryshev elimizdiń ShYU qurylǵan kúnnen bastap onyń negizin qalaǵan belsendi memleketterdiń biri bolǵandyǵyn ári solaı bolyp qala beretindigin, kóptegen túrli ıdeıalarǵa, jobalarǵa, qujattar men baǵdarlamalarǵa bastamashylyq etkendigin basa aıtty.
«Qazaqstan Prezıdenti N.Nazarbaev taıaýda Tashkentte ótken sammıtte ShYU aıasyndaǵy bizdiń elimizdiń negizgi baǵyttary óńirlik qaýipsizdikti nyǵaıtý, ekonomıkalyq yntymaqtastyqty damytý, kóliktik-tranzıttik áleýetti ashý, mádenı jáne gýmanıtarlyq baılanystardy tereńdetý bolatyndyǵyn naqty belgilep berdi», - dedi Sh.Nuryshev.
Dıplomat Qazaqstannyń jańa syn-qaterlermen birlesken kúreske zor mán beretindigin basa atap ótti.
«Tashkentte ótken ShYU sammıtindegi Qazaqstan Prezıdentiniń usynysyna sáıkes qazirdiń ózinde halyqaralyq terrorızmge qarsy birlesken is-qımyl týraly uıym málimdemesiniń jobasyn ázirleý jumystary bastalyp ketti. Ol taıaý ýaqytta múshe memleketterdiń qaraýyna usynylatyn bolady», - dedi Elshi.
Sonymen birge, Sh.Nuryshev óz sózinde ekonomıkalyq jáne mádenı-gýmanıtarlyq yntymaqtastyq máselelerine de toqtaldy. Bul rette ol Qazaqstan ShYU-ǵa tóraǵalyǵy kezinde, ásirese, ekonomıkalyq yntymaqtastyq máselelerine basa nazar aýdaratyndyǵyn basa aıtyp ótti.
«Eýrazııalyq ekonomıkalyq odaq pen qytaılyq «Jibek joly ekonomıkalyq beldeýi» bastamasyn túıindestirý óńirdiń barlyq elderi úshin ekonomıkalyq ósim men ınfraqurylymdyq qurylysta keń perspektıvalar ashatyn bolady. Qazaqstan Prezıdenti Tashkent sammıti barysynda ShYU-ǵa múshe memleketter men baıqaýshy elderdi biriktiretin Eýrazııalyq tranzıttik-kólik habyn qurý týraly usynys jasady. Qazaqstan óz tarabynan EAEO men Jibek joly ekonomıkalyq beldeýi aıasyndaǵy yntymaqtastyqty úılesimdi tolyqtyra túsetin «Nurly jol» ınfraqurylymdyq damý memlekettik baǵdarlamasyn júzege asyrýdy belsendi júrgizý ústinde», - dedi Elshi.
Sh.Nuryshev ShYU-nyń mádenı-gýmanıtarlyq baǵytyn ilgeri damytý maqsatynda Qazaqstannyń mádenı, bilim berý, densaýlyq saqtaý, qorshaǵan ortany qorǵaý, ǵylym men tehnıka, jastar saıasaty, týrızm men sport salalaryndaǵy ózara is-qımyldy tereńdetýge basa mán beretindigin basa aıtty.
«ShYU shtab-páterindegi múshe memleketter kúni» jobasy aıasynda Qazaqstan bizdiń uıymǵa tóraǵalyǵymyzǵa arnalǵan birqatar mádenı is-sharalardy uıymdastyrýdy josparlap otyr», - dedi Qazaqstannyń Qytaıdaǵy elshisi.
Sonymen birge Qazaqstan Elshisi QR Prezıdenti N.Nazarbaevtyń usysyna sáıkes «Bolashaq energııasy» taqyrybymen 2017 jyly ótetin EKSPO halyqaralyq mamandandyrylǵan kórmesiniń ashylýy qarsańynda, ıaǵnı 8-9 maýsymǵa ótkizilýi josparlanǵan Astana sammıtiniń ShYU-ǵa qazaqstandyq tóraǵalyqtyń negizgi ózegi bolatyndyǵyn basa aıtty.
Esterińizge sala keteıik, Qazaqstan Respýblıkasy Shanhaı Yntymaqtastyq Uıymyn qurýshy memleketterdiń biri sanalady. Elimiz bul bedeldi uıymǵa 2005 jáne 2011 jyldary tóraǵalyq etken bolatyn.
