Qazaqstan ózin munaı ónimderimen tolyq qanaǵattandyra alatyn memleketke aınalýy kerek - M.Esenbaev
TANA. 22 tamyz. QazAqparat /Aıdar Ospanalıev/ - Básekelestikti qorǵaý agenttiginiń tóraǵasy Májıt Esenbaevtyń pikirinshe, Qazaqstan ózin munaı ónimderimen tolyq qanaǵattandyra alatyn memleketke aınalýy kerek. Bul týraly ol búgin Bnews.kz portaly arqyly ótken onlaın konferentsııa barysynda málim etti.
Onyń paıymdaýynsha, búginde qalyń kópshilik arasynda Qazaqstan munaıly el degen jańsaq pikir qalyptasqan. Al shyn máninde biz eshqandaı da munaıly memleket emespiz. «Biz tek jylyna 80 mıllıon tonna munaı óndirip otyrǵan elmiz. Biz osy ýaqytta ózimizdiń ishki qajettiligimizdi janar-jaǵar maımen tolyqtaı qamtamasyz etip otyrǵan joqpyz. Sondyqtan bizge búgin janar-jaǵar maıǵa qatysty qalyptasqan máseleni qalaıda sheshý kerek. Sóıtip kólik ıeleri men aýyl sharýashylyǵy taýarlaryn óndirýshilerdi qajettiliktermen qamtamasyz etý kerek. Basqasha aıtqanda, biz munaı ónimderimen ózimizdiń qajetimizdi ózimiz qanaǵattandyra alatyn memleketke aınalýymyz kerek. Al ázirge biz elimizdi munaı ónimderimen tek 55-60 paıyzǵa ǵana qanaǵattandyryp otyrmyz»,-dedi M.Esenbaev.
