Qazaqstan ózin munaı ónimderimen qamtamasyz etýge ázirge daıyn emes - Energetıka mınıstrligi

ALMATY. QazAqparat - Qazaqstan óziniń munaı óńdeýshi zaýyttaryn jańǵyrtý jumystaryn aıaqtamaıynsha, eldi munaı ónimderimen qamtamasyz ete almaıdy. Bul týraly jýrnalıstermen bolǵan baspasóz máslıhatynda QR Energetıka mınıstri Maǵzum Myrzaǵalıev málim etti, dep habarlaıdy QazAqparat.

«Dızeldi otynǵa keletin bolsaq, bizde ylǵı Qazaqstan ózin munaı ónimdermen qamtamasyz ete alady ma?, degen másele týyndaıdy. Búgingi tańda biz eldegi munaı óndirýshi zaýyttardy jańǵyrtý jumystaryn aıaqtamaıynsha, oǵan daıyn emespiz. Benzın bizde 1 mıllıon tonnaǵa jýyq, alaıda, biz bul otyndy syrttan tasymaldaýǵa májbúrmiz. Birinshi kezekte Reseıden árıne. Al, dızeldi otyn shamamen 500-600 myń tonna»,-dedi Maǵzum Myrzaǵalıev.

Onyń sózine qaraǵanda, jaz mezgilinde Reseı men Qyrǵyzstan arasynda munaı ónimderine qatysty úlken aıyrmashylyq paıda boldy. Myrzaǵalıevtiń sózinshe, dızel otynyn memlekettik retteýden alyp tastaý májbúrli túrde, alaıda, durys qabyldanǵan sheshim boldy. Óıtkeni, zárýlik óte zor bolýy múmkin edi.

«Elimizdiń kóptegen aımaqtarynda dızeldi otyn jetkiliksiz. Jaǵdaıdyń osylaı bola turǵanynan qaramastan, úlken jelilerde ol tolyǵymen jetkilikti. Bul jerde úlken jeli dep biz QMG, Gelıos jáne Sinooil sııaqty kompanııalardy aıtyp otyrmyz. Olar dızeldi otynmen qamtamasyz etilgen. Óıtkeni, biz olardyń barlyǵyn jınap alyp, dızeldi otynnyń barlyǵyna birdeı jetpeýi múmkindigin eskerttik. Onyń ústine egin orý jumystary qyzǵan shaq. Sol sebepti biz jelidegilerdiń barlyǵyna Reseıden otyn satyp alý kerektigin aıttyq. Alaıda, bizdiń bul eskertpemizge barlyǵy birdeı nazar aýdarǵan joq. Sonyń saldarynan janarmaı quıý stansalarynda birshama zárýliktiń bolǵany da ras»,-dep naqtylady vıtse-mınıstr.

Onyń pikirinshe, Qazaqstan qazir tyǵyryqtan shyǵyp keledi, eń kúrdeli degen ýaqyttar artta qaldy.