Qazaqstan ózin astyqpen tolyq qamtamasyz etedi – Premer-Mınıstr

NUR-SULTAN. QazAqparat – QR Premer-Mınıstri Asqar Mamın bıylǵy egin orý jumystary jóninde Úkimet otyrysyn ótkizdi, dep habarlaıdy QazAqparat.

«Qazirgi ýaqytta barlyq óńirler jappaı egin jınaýǵa kiristi. Negizgi astyq egetin óńirlerde aýa raıy jazdyń ortasynda qurǵaq bolsa, qazir – turaqsyz. Sondyqtan ónimdi jınap alýmen qatar, jumysty barynsha tómen shyǵynmen oryndap úlgerý mańyzdy», - dedi Premer-Mınıstr búgingi Úkimet otyrysynda.

Onyń aıtýynsha, Úkimet tarapynan egin jınaý jumystaryn qarjylaı jáne materıaldyq-tehnıkalyq qamtamasyz etý jóninde barlyq qajetti sheshimder qabyldandy. Jalpy, barlyq qabyldanǵan sharalar esebinen bıylǵy astyqtyń boljamdy jalpy jınalymy 18 mln tonna deńgeıinde josparlanyp otyr.

«Qazaqstan ózin astyqpen tolyq qamtamasyz etedi. Eksport áleýeti de jaqsy bolady. Qomaqty resýrstyq bazasy men geografııalyq jaǵynan asa iri ótkizý naryqtarynyń ortasynda yńǵaıly ornalasýy otandyq agroónerkásip keshenin damytý úshin jáne Qazaqstannyń álemdik azyq-túlik habyna aınalýyna jaǵdaı jasaıdy. Taýarlar men qyzmet naryǵyndaǵy kúrdeli jaǵdaıdy eskergenniń ózinde, naryqtaǵy astyq pen basqa da azyq-túlik ónimi baǵasynyń serpini turaqty, tipti oń bolyp tabylady. Sondyqtan biz agroónerkásiptik keshendi orta jáne uzaq merzimdi perspektıvada ekonomıkanyń negizgi lokomotıvteriniń biri retinde kóremiz», - dedi Asqar Mamın.

Buǵan deıin QR Aýyl sharýashylyǵy mınıstri Saparhan Omarov Tótenshe jaǵdaı men karantın rejımine qaramastan, egin jınaý qarqyny artqanyn málimdedi.