Qazaqstan ózge elderge qansha munaı eksporttaıdy
ASTANA. KAZINFORM – Bıyl Baký-Tbılısı-Djeıhan baǵytynda 1,5 mln tonna Qazaqstan munaıyn tasymaldaý jóninde ýaǵdalastyqqa qol jetkizildi. Bul týraly QR Energetıka mınıstri Almasadam Sátqalıev aıtyp berdi.
«2023 jyly 90 mln tonna munaı óndirildi, bul 2022 jylǵy kórsetkishten 6,9%-ǵa joǵary. Qarashyǵanaqta jylyna 10-11 mln tonna óndirýdi qoldaý jobalary sheńberinde 5-shi jáne 6-shy kompressor salý bastaldy, tıisinshe 2025 jáne 2028 jyldary aıaqtalady», - dedi A. Sátqalıev mınıstrliktiń alqa otyrysynda.
Mınıstrdiń aıtýynsha, munaı eksporty da ósip, 70,5 mln tonnany nemese 109,6%-dy quraǵan.
«Kaspıı qubyr konsortsıýmynyń qazaqstandyq ýchaskesindegi kedergilerdi joıý jobasy aıaqtaldy. Bul ótkizý qabiletin jylyna 72,5 mln tonnaǵa deıin arttyrdy. Qazaqstandyq munaıdy «Transneft» JAQ jańa júıesi arqyly «Shvedt» munaı óńdeý zaýyty baǵytyndaǵy «Drýjba» munaı qubyry arqyly Germanııaǵa 1 mln tonna kóleminde tasymaldaý qamtamasyz etildi», - dedi Energetıka mınıstri.
Qazaqstan munaıy Baký-Tbılısı-Djeıhan júıesi arqyly 1 mln tonna kóleminde tasymaldandy. Bul Aqtaý porty arqyly Mahachkala jáne Baký baǵytyndaǵy munaı eksportyn 3,4 mln tonnaǵa deıin nemese 2022 jylmen salystyrǵanda 52%-ǵa ulǵaıtýǵa múmkindik berdi.
Qazaqstandyq munaıdyń Qytaıǵa eksporty 1,2 mln tonna kóleminde, Ózbekstanǵa temirjol boıynsha 0,065 mln tonna kóleminde qamtamasyz etildi.
Sonymen qatar, Reseı munaıynyń el aýmaǵy arqyly tranzıti: Qytaıǵa – 10 mln tonna, Ózbekstanǵa – 0,15 mln tonnany kórsetken.
«Drýjba júıesi boıynsha munaıdy 1,2 mln tonna kóleminde, sondaı-aq Baký-Tbılısı-Djeıhan baǵytynda tıisinshe 2024 jylǵa 1,5 mln tonna kóleminde tasymaldaý jóninde ýaǵdalastyqqa qol jetkizildi», - dedi A. Sátqalıev.
