Qazaqstan ózge el azamattaryn Taıaý Shyǵystan evakýatsııalaýǵa daıyn — QR SІM
ASTANA. KAZINFORM — Qazaqstan Taıaý Shyǵys elderinen ushatyn evakýatsııalyq reısterde bos oryn bolǵan jaǵdaıda ózge el azamattaryn da alyp ketý múmkindigin qarastyrýǵa daıyn. Bul týraly Syrtqy ister mınıstrliginiń resmı ókili Erlan Jetibaev aıtty.
Onyń aıtýynsha, qazirgi ýaqytta mundaı ótinishter túspegen.
– Azamattar eń aldymen ózderiniń dıplomatııalyq ókildikterine júginedi. Alaıda ótinish jasalǵan jaǵdaıda jáne reısterde bos oryndar bolsa, biz kórshiles memleketterdiń azamattaryna kómek kórsetýge daıynbyz, – dedi E.Jetibaev elordada ótken baspasóz máslıhatynda.
Resmı ókildiń aıtýynsha, búgingi kúnge deıin shıelenis aımaqtarynan 946 azamat aman-esen shyǵaryldy. Jaqynda Oman astanasy Maskat qalasynan Almatyǵa 314 qazaqstandyq mingen reıs ushyp keledi.
Búgingi tańda Iranda 47 qazaqstandyq, Izraılde 163, Qatarda 3 myńnan astam, Birikken Arab Ámirlikterinde 4 myńnan astam, Saýd Arabııasy koroldiginde shamamen 1800 QR azamattary bar.
