Qazaqstan ózenderindegi jaǵdaı turaqty - AShM
ASTANA. 10 sáýir. QazAqparat - Qazaqstan ózenderindegi jaǵdaı turaqty.
Bul týraly búgin QR AShM Sý resýrstary komıtetiniń tóraǵasy Islam Ábishev málim etti.
Onyń atap ótýinshe, ýaqytyly qabyldanǵan sharalardyń arqasynda Syrdarııa ózeniniń tómengi arnasy tótenshe jaǵdaılarsyz tolyǵymen muzdan tazartyldy. Qazirgi ýaqytta Shardara sý qoımasyna túsken ortasha sý ótimi sekýndyna 723 tekshe metrdi quraýda.
«Elimizdiń qalǵan aýmaqtarynda sý sharýashylyǵynyń jaǵdaıy bir qalypty. Batys-Qazaqstan, Aqtóbe, Qostanaı, Soltústik Qazaqstan, Aqmola, Qaraǵandy oblystarynyń ózenderinde kóktemgi sý tasý tolqynynyń damýy jalǵasýda», - dedi ol.
Komıtet basshysynyń atap ótýinshe, Oral, Sherýbaı-Nura, Esil, Qalqutan, Tobyl, Aıat, Toǵyzaq jáne Úı ózenderinde sý deńgeıiniń 1-2 metrge kóterilýi baıqalǵan. Sonymen qatar Or, Ýtva, Derkúl, Іlek, Qaraqala, Úlken Hobda, Esil ózenderinde sý deńgeıi 2-2,8 metrge, Qosistek jáne Shaǵan ózenderinde 3,4-4 metrge deıin kóterilgen.
