Qazaqstan ózenderinde sý tasqyny bolýy múmkin

26 jáne 29 naýryzda Túrkistan oblysynyń ońtústigi men taýly, taý bókterindegi aımaqtarynda, 26-27, 29 naýryzda Jambyl oblysynyń soltústik-shyǵysynda, ońtústiginde, taýly jáne taý bókterindegi aımaqtarynda, 27 jáne 29 naýryzda Almaty oblysynyń ońtústiginde jáne taýly aımaqtarynda jańbyr men qar túrindegi qatty jaýyn-shashyn kútiledi. Osyǵan baılanysty joǵaryda atalǵan oblystardyń taý bókterinde sý tasqynynyń qalyptasýy yqtımal.

Shyǵys Qazaqstan oblysynda 28 jáne 30 naýryzda - qalyń qar, 29 naýryzda - qatty jaýyn-shashyn (jańbyr, qar), 29 naýryzda Aqmola oblysynda – kóbine qar túrinde ótetin jaýyn-shashyn bolatyny boljanyp otyr.

Batys Qazaqstan oblysynda 27-28 naýryz kúnderi oblystyń ońtústiginde, 30 naýryzda oblystyń batys jartysynda aýa temperatýrasy túnde 3 gradýs jyly, kúndizgi aýa temperatýrasynyń negizgi fony 2-7 gradýs jyly bolady dep kútilýde.

30 naýryzdan bastap Aqtóbe, Qostanaı, Aqmola, Soltústik Qazaqstan oblystarynda, 31 naýryzdan bastap Pavlodar oblysynda kúndiz aýa temperatýrasy 2-5 gradýs jyly bolady.

Qaraǵandy oblysynda 28-29 naýryzda, 1 sáýirde oblystyń ońtústiginde aýa temperatýrasy túnde 3 gradýs, kúndiz -3 gradýstan +2 gradýs jyly, oblystyń ońtústiginde 7 gradýs, ońtústik-shyǵysynda 3 gradýs, al, ońtústiginde 8-13 gradýs jyly bolatyny boljandy.

Osyǵan baılanysty, joǵaryda atalǵan óńirlerde qardyń jáne ózenderdegi muzdyń qarqyndy erýi kútilýde.

Qazaqstannyń oıpatty ózenderiniń basseınderinde jınaqtalǵan ylǵal qorynyń kólemi kelesideı: Qaraǵandy, Aqmola, Aqtóbe jáne Batys Qazaqstan, Qostanaı oblystarynda orta eseppen 12%-dan 45%-ǵa deıin azaıǵan.

Naýryz, sáýir aılarynda meteostansalarda júrgizilgen kópjyldyq baqylaýlar boıynsha, bir táýlikte jaýyn-shashynnyń aılyq normasy túsýi, bul óz kezeginde qaýipti tabıǵı gıdrometeorologııalyq qubylystardyń oryn alýyna ákelýi múmkin.