Qazaqstan Ózbekstannyń júk tasymaldaý naryǵyndaǵy draıveri bolady – sarapshy

ASTANA. QazAqparat – Qazaqstan Qytaımen qatar, Ózbekstannyń júk tasymaldaý naryǵyndaǵy draıveri bolmaq. Ózbekstandaǵy ATI.SU halyqaralyq júk tasymaldaý bırjasy ókildiginiń dırektory Farıd Vahıdov osyndaı pikir aıtty, dep habarlaıdy QazAqparat UZA agenttigine silteme jasap.

ATI.SU halyqaralyq júk tasymaldaý bırjasynyń derekteri kórsetkendeı, Ózbekstan naryǵy geosaıası jaǵdaılarǵa baılanysty týyndaǵan byltyrǵy ósimnen keıin tepe-teńdikke enip jatyr. Ózbekstanǵa júk tasymaldaýǵa ótinimder sany ótken jyldyń sáıkes kezeńimen salystyrǵanda qańtardan maýsymǵa deıin 77 paıyzǵa ósti. Reseıden tasymaldaýǵa suranys 75 paıyzǵa, sondaı-aq Qazaqstan, Belarýs jáne Qytaıdan da aıtarlyqtaı ósti. Sol kezeńde júk tasymalyna stavkalar 8 paıyzǵa ósti.

Sonymen birge, ekinshi toqsanda dınamıka baıaýlady. 2023 jyldyń birinshi toqsanymen salystyrǵanda Ózbekstanǵa júk tasymaldaýǵa ótinimder sany 31 paıyzǵa qysqardy, onyń ishinde Reseı baǵytynda aıtarlyqtaı tómendegen (-30 paıyz). Eksporttyq tasymaldarda ósim odan erterek toqtady. Birinshi jartyjyldyqta Ózbekstannan bırjada ornalastyrylǵan ótinimder sany ótken jyldyń sáıkes kezeńimen salystyrǵanda 4 paıyzǵa qysqardy. Reseı baǵytynda qysqarý 8 paıyz boldy, biraq Qazaqstan men Belarýske tasymaldaýǵa suranys, kerisinshe azdap ósti. Bul rette eksporttyq júk tasymaldaryna stavkalar 13 paıyz ósimdi kórsetti.

«Jalpy, halyqaralyq tasymaldaý naryǵy ótken jylǵy ósimnen keıin birtindep teńesip jatyr. Oǵan negizinen Reseıge qarsy sanktsııalar yqpal etken bolatyn. Qalaı bolǵanda da, Reseı baǵytynda biz jaqyn arada jańa ósim kútip otyrǵan joqpyz, biraq azdaǵan ózgeris bolýy da múmkin. Esesine, basqa baǵyttar, eń aldymen Qazaqstan men Qytaı ósý draıveri bola alady», - dedi Farıd Vahıdov.