Qazaqstan Ózbekstannyń Sardoba sý qoımasyna júrgiziletin tehnıkalyq aýdıtke qatysady
Ekologııa, geologııa jáne tabıǵı resýrstar mınıstrliginiń baspasóz hatshysy Samal Ibraeva Facebook -tegi paraqshasynda jazǵandaı, Qazaqstan Prezıdenti Qasym-Jomart Toqaev pen Ózbekstan basshysy Shavkat Mırzıeevtiń qol jetkizgen kelisimin júzege asyrý aıasynda taraptar eki el arasyndaǵy sý sharýashylyǵynyń mańyzdy salalaryn talqylady. Kezdesýdiń basty maqsattarynyń biri – Sardoba sý qoımasynyń taǵdyry. Qazaqstannyń ekologııa, geologııa jáne tabıǵı resýrstar mınıstri Maǵzum Myrzaǵalıev sý qoımasynyń jarylýy Ózbekstanmen birge Qazaqstanda turatyn halyqqa da úlken ekonomıkalyq shyǵyn ákelgenin málim etken.
«Kelissózder barysynda biz Sardoba sý qoımasy boıynsha sheshimdi birlese qabyldaý týraly sheshimge keldik. Sý qoımasyna halyqaralyq jáne qazaqstandyq sarapshylardyń qatysýymen tehnıkalyq aýdıt júrgiziledi. Onyń qorytyndysy boıynsha osy sý qoımasynyń taǵdyry sheshiledi», - dep pikir bildirdi kezdesý qorytyndysy jaıly Maǵzum Myrzaǵalıev.
Sonymen qatar taraptar transshekaralyq sý qoımalaryn basqarý, paıdalaný men kúzetý isterin birlese júrgize úshin úkimetaralyq kelisim ázirlep, qol qoıatyny jaıly kelisimge kelgen. Taraptar osy jyldyń 15 maýsymyna deıin Sý qatynastary salasyndaǵy yntymaqtyq boıynsha jol kartasyn ázirlep, bekitýge kelisti. Kezdesýge qatysýshylar odan bólek 2020 jyly Syrdarııa ózeni boıynsha vegetatsııalyq kezeńdi ótkizý sharalardy ótkizýdi ózara maquldasty.
«Negizgi gıdroqurylymdar men sý sharýashylyǵy ýchaskelerine monıtorıng pen baqylaý júrgizý boıynsha birleske jumysty uıymdastyrý týraly sheshimge qol jetkizildi», - dedi Maǵzum Myrzaǵalıev.
Kezdesýge qatysýshylar Syrdarııa ózeniniń sý resýrsynyń sharýashylyq úılesimi boıynsha birlesken jumysty júrgizýge kelisip, Qaradarııa men Shyrshyq ózenderine sý jiberý lımıtin talqylaý múmkindigin qarastyrdy.
