Qazaqstan Ózbekstannyń basty seriktesiniń biri - Saıdıkram Nııazhodjaev
ASTANA. QazAqparat-Búgin Tashkentte «Ózbekstan-Qazaqstan: dıplomatııalyq qarym-qatynastyń ornaýyna 25 jyl» taqyrybyndaǵy konferentsııa óz jumysyn bastady, dep habarlaıdy QazAqparattyń menshikti tilshisi.
Ózbekstan Prezıdenti janyndaǵy Strategııalyq jáne óńiraralyq zertteýler ınstıtýty men QR Prezıdenti Qazaqstannyń strategııalyq zertteýler ınstıtýty uıymdastyrǵan ǵylymı konferentsııaǵa atalǵan eki ınstıtýttyń basshylyǵy, Ózbekstannyń mınıstrlikteri men vedomstvolarynyń ókilderi, sondaı-aq dıplomatııalyq korpýstar men halyqaralyq uıymdardyń basshylary keldi. Qazaqstan tarapynan QSZI dırektory Zarema Sháýkenova men QR-nyń Ózbekstandaǵy Tótenshe jáne ókiletti elshisi Erik Ótembaev qatysty.
Konferentsııanyń ashylýynda sóz sóılegen Ózbekstan Syrtqy ister mınıstriniń orynbasary Saıdıkram Nııazhodjaev memleketaralyq qarym-qatynastyń barlyq spektrindegi eki eldiń yntymaqtastyq deńgeıi joǵary ekendigin atap ótti.
«QR men ÓR arasyndaǵy dıplomatııalyq qarym-qatyntastyń ornaǵanyna nebári 25 jyl sanalady. Degenmen, baýyrlas eki halyqtyń arasyndaǵy tarıhı jáne mádenı baılanystardyń san ǵasyrlyq tamyrlastyǵy bar. Eger, bizdiń ózara qarym-qatynasymyzdyń tarıhı ótkenine kóz salar bolsa, onda onyń tatý jáne shynaıy kórshilestiktiń shynaıy úlgisi bolyp tabylatyndyǵyn nyq senimmen aıtýǵa bolady. Munyń dáleli retinde Sizderdiń nazarlaryńyzdy kelesi faktorlarǵa aýdarsam deımin. Birinshiden, qysqa ǵana ýaqyttyń ishinde elderdiń arasyndaǵy qarym-qatynasta biz strategııalyq seriktes deńgeıine shyqtyq. Ekinshiden, 200-den astam qujatty qamtıtyn aýqymdy sharttyq-quqyqtyq baza qalyptasty. Úshinshiden, Qazaqstan búgingi kúni Ózbekstannyń basty saýda-ekonomıkalyq seriktesteriniń biri bolyp otyr. Tórtinshiden, bizdiń baýyrlas halyqtarymyz úshin tiri kópir qyzmetin atqaratyn mádenı-gýmanıtarlyq saladaǵy baılanystar barynsha belsendi», - dedi Saıdıkram Nııazhodjaev.
Sonymen qatar ol Ózbekstan aýmaǵynda turyp jatqan qazaqtardyń múmkinshiligi jáne olardyń ana tilinde laıyqty bilim alýyna qatysty da máselelerge toqtaldy.
«Ózbekstanda shamamen 800 myń qazaq turyp jatyr. 380 mektepte sabaq qazaq tilinde júredi. Tek qana qazaq tilinde bilim beretin 162 mektep jumys istep tur. Qazaq tilinde joǵary bilim alý úshin 5 joǵary oqý ornynda fakýltetter, qazaq tili men ádebıeti bólimsheleri qurylǵan. 1992 jyldan beri Ózbekstanda qazaq mádenı ortalyǵy jumys istep tur. Onyń el aýmaǵynda 10 óńirlik bólimshesi bar», - dedi QR Syrtqy ister mınıstriniń orynbasary.
