Qazaqstan Ózbekstannyń eń iri úsh saýda seriktesiniń qataryna kirdi
ASTANA. KAZINFORM — 2026 jyldyń birinshi jartyjyldyǵynyń qorytyndysy boıynsha Qazaqstan men Ózbekstan arasyndaǵy taýar aınalymy 2,8 mlrd dollar boldy.
Ózbekstan Ulttyq statıstıka komıtetiniń málimetinshe, 2026 jyldyń alǵashqy alty aıynda respýblıka álemniń 195 elimen saýda-ekonomıkalyq baılanys ornatqan.
Ózbekstannyń negizgi saýda seriktesteri qatarynda Qytaı 9,5 mlrd dollar kórsetkishpen birinshi orynǵa shyqsa, Reseı 7 mlrd dollarmen ekinshi, Qazaqstan 2,8 mlrd dollarmen úshinshi orynǵa jaıǵasqan.
Sonymen qatar Ózbekstannyń eń iri on saýda seriktesiniń qataryna Túrkııa (1,4 mlrd dollar), Aýǵanstan (1,1 mlrd dollar), Ońtústik Koreıa (940 mln dollar), Frantsııa (890,9 mln dollar), Birikken Arab Ámirlikteri (807,7 mln dollar), Qyrǵyzstan (624,6 mln dollar) jáne Germanııa (623,2 mln dollar) kirdi.
Eske salaıyq, buǵan deıin Qazaqstan men Ózbekstan ónerkásiptik kooperatsııany tereńdetýge nıetti ekenin jazǵan edik.
Onyń aldynda Qazaqstan men Ózbekstan arasyndaǵy taýar aınalymy 2,7 mlrd dollardan asqanyn habarlaǵanbyz.
Ózbekstan Ulttyq statıstıka komıtetiniń aqparatyna saı, alty aıda eldiń syrtqy saýda aınalymy 41 mlrd dollarǵa teńelip, 2025 jyldyń sáıkes kezeńimen salystyrǵanda 7,4%-ǵa ósti. Qańtar-maýsymda kórshiles memleket álemniń 195 elimen saýda-sattyq jasady.
