Qazaqstan Ózbekstannan sý alatyn arnalarǵa kúrdeli jóndeý júrgizbek

TAShKENT. KAZINFORM – Qazaqstan Ózbekstannan sý alatyn ırrıgatsııa júıelerine kúrdeli jóndeý júrgizý úshin jobalyq-smetalyq qujattama ázirlep jatyr. Bul týraly Tashkentke jumys saparymen kelgen QR Sý resýrstary jáne ırrıgatsııa mınıstri Nurjan Nurjigitov málim etti, dep habarlaıdy Kazinform agenttiginiń menshikti tilshisi.

- Biz bıyl eki el arasyndaǵy ırrıgatsııalyq júıelerge josparly jóndeýdi tolyq aıaqtadyq. Ózbekstannan shyǵyp, Qazaqstanǵa ótetin «Zah-Hanym» jáne «Úlken Keles» arnalary bar. Olar arqyly Túrkistan oblysyna sý baǵyttalyp jatyr. Endi josparly jóndeýden bólek, kúrdeli jóndeý júrgizý úshin biz jobalyq-smetalyq qujattama ázirlep jatyrmyz. Bul Qazaqstanǵa tıesili jumys. Óıtkeni, atalǵan arnalar arqyly sýdy biz alyp otyrmyz, - dep jaýap berdi Nurjan Nurjigitov Kazinform tilshisiniń saýalyna.

Eske salaıyq, jyl basynda QR Sý resýrstary jáne ırrıgatsııa mınıstri Nurjan Nurjigitov pen onyń ózbekstandyq áriptesi Shavkat Hamraev kezdesý ótkizgen bolatyn. Onyń barysynda taraptar ırrıgatsııalyq júıelerdi vegetatsııalyq kezeńge deıin birlesip jóndeýge ýaǵdalasqan edi.