Qazaqstan Ózbekstannan «Dostyq» kanaly arqyly 922 mln tekshe metr sý alady
ASTANA. KAZINFORM - Sý resýrstary jáne ırrıgatsııa mınıstri Nurjan Nurjigitov Memleketaralyq sý sharýashylyǵyn úılestirý komıssııasynyń (MSShÚK) 86-shy otyrysyna qatysty. Oǵan Qazaqstan, Qyrǵyzstan, Tájikstan, Túrikmenstan jáne Ózbekstan kiredi.
Sý resýrstary jáne ırrıgatsııa mınıstrligi baspasóz qyzmetiniń málimetinshe, kezdesý qorytyndysy boıynsha mınıstr «Dostyq» memleketaralyq kanaly arqyly sýarý maýsymynda Qazaqstanǵa 922 mln tekshe metr sý berý týraly kelisimge keldi. Bul rette Túrkistan oblysynyń Shardara sý qoımasyna 4,8 mlrd tekshe metr sý jınalǵanyn aıta ketken jón.
Al Qazaqstannyń ońtústigindegi egis alqaptaryn sýarý úshin sý alynatyn Toqtoǵul (Qyrǵyzstan) sý qoımasyna 8 mlrd tekshe metr sý jınaldy. Sondaı-aq, otyrysta osy jyldyń 30 qyrkúıegine deıin Naryn-Syrdarııa sý qoımalary kaskady jumysynyń boljamdy kestesi bekitildi.
Otyrysqa qatysýshylar jyl basynan beri elimiz tóraǵalyq etetin Halyqaralyq Araldy qutqarý qory aıasyndaǵy jumysty jeke talqylady.
Búgingi kúnge Qazaqstan tarapy barlyq uıymdastyrý jumystaryn aıaqtady. Sondaı-aq, «Ortalyq Azııa elderi arasynda sý-energetıkalyq yntymaqtastyq tetigin qurý týraly» kelisim jobasy ázirlenip jatyr.
«Qazir bizdiń basty mindetimiz – tasqyn sýyn jınaý. Biz ony Kaspıı, Balqash, Qamys-Samar kólderine, Ulytaý oblysynan Qyzylorda oblysynyń kólderine jáne t.b. baǵyttaımyz. Biraq sonymen qatar ońtústik óńirlerdi de sýmen qamtamasyz etý mańyzdy. Bul máselede sý dıplomatııasy óte mańyzdy», - dedi Sý resýrstary jáne ırrıgatsııa mınıstri Nurjan Nurjigitov.
MSShÚK-niń kelesi otyrysy osy jyldyń qyrkúıek aıynda Túrkimenstanda ótedi.
