Qazaqstan Ózbekstanmen shekaradaǵy joldar men kópirlerdi keńeıtedi
ShYMKENT. QazAqparat - Qazaqstan Ózbekstanmen shekaradaǵy ótkizý pýnktteri arasyndaǵy joldar men kópirlerdi keńeıtedi. Búgin bul týraly OQO óńirlik kommýnıkatsııalar qyzmetinde ótken brıfıngte oblystyq Memlekettik kirister departamentiniń basshysy Altynsary Úmbetalıev málim etti.
«Qazirgi tańda «Qazyǵurt», «Qaplanbek» jáne «Atameken» keden beketterin táýlik boıy jumys kestesine kóshirip, shekaradan ótetin taýarlar men kólik quraldaryn resimdeýdi jyldamdatýǵa qol jetkizip otyrmyz. Sondaı-aq, ótkizý pýnktteri arasyndaǵy joldar men kópirlerdi keńeıtip, jeke tulǵalarǵa shekaradan ótýge yńǵaıly jaǵdaı jasaıtyn bolamyz. Aıta keterligi, aǵymdaǵy jyldyń 9 aıynda Qazaqstan men Ózbekstan arasyndaǵy taýar aınalymy 554 mln AQSh dollaryn qurady», - dedi Altynsary Dúısenbekuly.
Sonymen qatar, oblys ortalyǵy Shymkent qalasynda ótken Qazaqstan-Ózbekstan delegatsııasynyń ekijaqty kelisimine sáıkes, «Atameken» keden beketiniń «Syrdarıa» jáne «Tselınnyı» ótkizý pýnktteri ashylyp otyr.
Departament basshysynyń aıtýynsha, oblysta «Tsıfrlyq Qazaqstan» memlekettik baǵdarlamasy aıasynda «Salyq jáne kedendik ákimshilendirýdi tsıfrlandyrý» pılottyq jobasy iske asyrylýda.
«Jańa júıeniń engizilýi - tapsyratyn qujattardyń azaıýyna, ýaqytty únemdeýge úlken múmkindik beredi. Pılottyq jobanyń aıasynda «Astana-1» aqparattyq jańa júıesi qoldanysqa engizildi. Atalǵan júıe barlyq keden beketterine ornatylyp, búgingi tańda 6 myńǵa jýyq tranzıttik deklaratsııa rásimdelgen», - dedi Altynsary Dúısenbekuly.
Aıta keterligi, Ońtústik Qazaqstan oblysynda búgingi tańda 557 143 avtokólik tirkelgen. Salyq kodeksine sáıkes, 59 265 avtokólik ıelerinde jeńildik bar. Qazirgi tańda oblys kóleminde tólenbegen kólik salyǵyn óndirý boıynsha jumystar atqarylýda.
