Qazaqstan Ózbekstanǵa jylyna 5 mln tonna munaı eksporttaýy múmkin

ASTANA. QazAqparat - QR Energetıka mınıstri Qanat Bozymbaev Qazaqstannan Ózbekstanǵa jylyna 5 mln tonna munaı jetkizý máselesi pysyqtalyp jatqanyn aıtty, dep habarlaıdy QazAqparat tilshisi.

«Qazaqstan aldaǵy ýaqytta da Ózbekstanǵa óz resýrstarynan munaı jetkizýge daıyn. Shaǵyr stantsııasyndaǵy temirjol tsısternalaryna aýystyryp tıeý arqyly «Keńqııaq-Qumkól» munaı qubyry boıynsha jetkiziledi. Qazirgi ýaqytta osy baǵyttaǵy tarıf bir tonna úshin shamamen 25 AQSh dollaryn quraıdy», - dedi mınıstr Parlament Májilisiniń jalpy otyrysynda.

Onyń sózine qaraǵanda, RF tarapy ózbek jaǵynyń suraýyna sáıkes, Ózbekstanǵa jylyna 1 mln tonnaǵa deıin munaı jetkizý máselesin qarastyrýda. Bul rette Qazaqstan eki el arasynda tranzıttik tarap retinde qaralady.

«Jalpy aıtqanda, Ózbekstan jylyna 5 mln tonnaǵa deıin munaı satyp alýdy josparlaýda. Sonyń ishinde Qazaqstannan 2 mln, al Reseıden 3 mln tonna satyp alýǵa múddeli. Aıta ketý kerek, negizi búgingi tańda 5 mln tonnany tutastaı Qazaqstannan alý máselesi qaralýda. Ózbekstanǵa 5 mln tonnaǵa deıin munaıdy turaqty jetkizý úshin kólik ınfraqurylymyna birshama ınvestıtsııa qajet», - dedi Qanat Bozymbaev.

Budan buryn habarlanǵandaı, Parlament Májilisiniń jalpy otyrysynda «Qazaqstan Úkimeti men Ózbekstan Úkimeti arasyndaǵy Energetıka salasyndaǵy yntymaqtastyqtyń keıbir máseleleri týraly negizdemelik kelisimdi ratıfıkatsııalaý týraly» zań jobasy maquldandy.