Qazaqstan Ózbekstanǵa mashına jasaý jáne qurylys salasynda birlesken jobalardy usynady
QR Indýstrııa jáne ınfraqurylymdyq damý mınıstri Qaıyrbek Óskenbaev Ózbekstan prezıdenti Shavkat Mırzıeevtiń qatysýymen ótken Birinshi Tashkent halyqaralyq ınvestıtsııalyq forýmynda sóz sóıledi.
QR IIDM basshysy óz sózinde jahandyq ekonomıkany túbegeıli transformatsııalaý kezeńinde Ortalyq Azııa elderi ekonomıkalarynyń damý qarqynyn saqtaý úshin óńirishilik ózara is-qımyldy nyǵaıtý qajet ekenin atap ótti. Birqatar baǵyttar boıynsha ekonomıkalyq kooperatsııa respýblıkalardyń ınvestıtsııalyq tartymdylyǵyn saqtaýdyń tıimdi tásili bola alady.
Bul rette mınıstr joǵary jyldamdyqty «Túrkistan-Shymkent-Tashkent» jolaýshylar temirjol magıstrali jobasyn mysalǵa keltirip, Ortalyq Azııadaǵy kólik dálizderin damytýǵa jáne jańǵyrtýǵa nazar aýdarý qajettigin aıtty.
Sondaı-aq, Qazaqstan Prezıdenti Q.Toqaevtyń «TURAN» arnaıy ekonomıkalyq aımaǵyn jáne agroónerkásip kesheni ónimderin qaıta óńdeý, aǵash óńdeý, mashınalar, elektronıka, toqyma jáne qurylys materıaldaryn óndirýmen aınalysatyn «Ortalyq Azııa» saýda-ekonomıkalyq yntymaqtastyq halyqaralyq ortalyǵyn qurý jónindegi bastamasyn iske asyrý usynylady.
Bul jobalar transshekaralyq saýda-logıstıkalyq ınfraqurylymdy jáne óńir elderi arasyndaǵy óndiristik kooperatsııany damytýǵa baǵyttalǵan.
«Búkil álemde tikeleı ınvestıtsııalar kólemi azaıyp, jahandyq básekelestik kúsheıip keledi. Sonyń saldarynan barlyq memleketter ınvestorlardy tartý úshin jańa qadamdar men quraldar izdeıdi. Osyndaı jaǵdaıda Ortalyq Azııa elderi sheteldik kapıtal úshin jańa baǵdar bolýy qajet. Álemdik ekonomıkadaǵy ózgerister men úrdister ár elden ınvestıtsııalyq quraldardy jetildirýdi, tásilder men tájirıbelerdi júıeli túsinýdi talap eted»,- dedi Q.Óskenbaev.
Mınıstrdiń aıtýynsha, Qazaqstanda barynsha qolaıly ınstıtýtsıonaldyq jáne ınfraqurylymdyq jaǵdaılar jasalýda. Atap aıtqanda, ınvestıtsııalyq saıasattyń jańa tujyrymdamasy ázirlenip, ınvestorlardy qoldaýdyń jańa quraly retinde strategııalyq ınvestıtsııalyq kelisim engizildi.
Investorlardyń usynystaryn talqylaý jáne problemalardy jedel sheshý úshin QR Prezıdenti janyndaǵy Sheteldik ınvestorlar keńesi, ınvestıtsııalyq klımatty jaqsartý jónindegi keńes, QR Premer-Mınıstriniń tóraǵalyǵymen ınvestıtsııalyq shtab jáne ınvestıtsııalyq ombýdsmen jumys isteıdi. Qazaqstanda ınvestorlardy qorǵaýǵa «Astana» halyqaralyq qarjy ortalyǵynyń táýelsiz soty men aǵylshyn quqyǵyna negizdelgen halyqaralyq tórelik ortalyǵy kepildik beredi.
Álemdik tájirıbege súıene otyryp, Qazaqstanda daıyn ınjenerlik- kommýnıkatsııalyq ınfraqurylymdy jáne ınvestıtsııalyq preferentsııalardyń keń aýqymyn usynatyn 27 ındýstrııalyq aımaq pen 13 arnaıy ekonomıkalyq aımaq jumys isteıdi.
Jańa kezeńde Qazaqstanda barlyq salalarǵa tereń taldaý júrgizilip, sonyń negizinde ınvestorlardy tartý úshin naqty jobalar men usynystar ázirlenedi.
Sondaı-aq, Qaıyrbek Óskenbaev Qazaqstan men Ózbekstannyń ónerkásip salasyndaǵy tabysty yntymaqtastyǵy jóninde aıtty. Sońǵy jyldary eki el
mashına jasaý, jeńil ónerkásip jáne qurylys salalarynda jalpy somasy $22 mln quraıtyn 6 jobany iske asyrdy. Jaqynda «Astana Motors» kompanııasy $15 mln ınvestıtsııa salyp, Ózbekstannyń 7 qalasynda 10 dılerlik ortalyǵyn ashty.
Qazir Qazaqstan men Ózbekstan mashına jasaý jáne qurylys ındýstrııasy salasynda $55 mln-ǵa 5 jobany iske asyrýda. Olar: Qostanaı qalasynda jeńil avtomobılder men traktorlar, Saranda Howo júk avtomobılderi, Shymkentte medıtsınalyq buıymdar men jeke gıgıena quraldary, «Angren» AEA-da avtoklavty gazobeton óndirisi. Sondaı-aq, qurylys ındýstrııasy jáne mashına jasaý salasynda $348,5 mln somasyna 6 jańa kooperatsııalyq joba pysyqtalýda.
Budan basqa, Qazaqstannyń shıkizatpen qamtamasyz etilýin, shaǵyn jáne orta kásipkerlikti, ınvestorlardy jáne óńdelgen daıyn ónim óndirisin memlekettik qoldaýdyń aýqymdy sharalaryn eskere otyryp, ózbek tarapyna taǵy 5 jobany birlesip iske asyrý usynylady. Olar: Pavlodar qalasyndaǵy alıýmınıı avtomobıl dıskileri men profılderin, Qaraǵandy oblysyndaǵy avtomobıl tabaqtaryn, Atyraý oblysynda polıpropılendi jáne Ózbekstan aýmaǵyndaǵy shaǵyn kerneýli transformatorlardy óndirý jobalary.
«Tashkenttegi forým aıasynda bıznes ókilderimen 50-den astam ekijaqty kezdesýler ótkizdik. Onyń ishinde «Azia Metall Prof», «Dentafill Kazakhstan», «Orient Ceramic»kompanııalary bar. Nátıjesinde qosymsha pysyqtaý jáne iske asyrý úshin 10-nan astam jańa perspektıvalyq joba aıqyndaldy», - dedi mınıstr.
Sóz sońynda Qaıyrbek Óskenbaev Ortalyq Azııa elderiniń isker toptary arasyndaǵy yntymaqtastyq boıynsha syndarly dıalog qurýdyń mańyzdylyǵyn atap ótti.
