Qazaqstan Ózbekstanǵa azyq-túlik jetkizýde kósh bastap tur

TAShKENT. QazAqparat - Ózbekstan bıylǵy jeti aıda Qazaqstannan jetkiziletin azyq-túlik taýarlarynyń ımportyn 1,4 ese kóbeıtti, dep habarlaıdy QazAqparat.

Ózbekstan Respýblıkasy memlekettik statıstıka komıtetiniń málimetinshe, qańtar-shilde aılarynda Qazaqstan jalpy ımporttaǵy 37 paıyz úlesimen azyq-túlik ónimderin jetkizetin negizgi elder tiziminde birinshi oryndy saqtap qaldy.

Ótken jyldyń sáıkes kezeńimen salystyrǵanda, qazaqstandyq ónimdi satyp alý 1,4 ese ósip, qarjylyq kórsetkishter 499,3 mln dollardan 698,9 mln dollarǵa deıin ósti.

Vedomstvo málimetinshe, Qazaqstannan bıdaı ımporty 344,9 mln dollardan 422,4 mln dollarǵa (1,2 ese), bıdaı uny 45,9 mln dollardan 68,5 mln dollarǵa (1,5 ese), ósimdik maıy 43,6 mln dollardan 62,5 mln dollarǵa (1,4 ese), margarın jáne maı – 2,6 mln dollardan 35,5 mln dollarǵa deıin (13,2 ese), et – 10,2 mln dollardan 39,6 mln dollarǵa deıin (3,9 ese) ósti.

Importtaýshy elderdiń bestigine sondaı-aq Reseı – 24,6% (ımporttyń jalpy kóleminen), Brazılııa – 13,8%, Belarýs – 4,3%, Pákistan – 2,7% kirdi.

Buǵan deıin Ózbekstanda ımporttalatyn unnyń 95 paıyzdan astamy qazaqstandyq ónimderge tıesili ekeni habarlanǵan bolatyn.