Qazaqstan Ózbekstanǵa 2,1 mln tonna aýyl sharýashylyǵy ónimderin jetkizedi
Tashkenttegi bıznes-forým aıasynda eki eldiń Aýyl sharýashylyǵy mınıstrleri yntymaqtastyqtyń tıisti baǵdarlamasyna qol qoıdy. Saladaǵy ózara is-qımyl máseleleri Qazaqstan Prezıdentiniń Ózbekstanǵa memlekettik sapary aıasynda talqylandy.
QR AShM basshysy Erbol Qarashókeevtiń aıtýynsha, 2025 jylǵa deıin quny 193,1 mln dollar bolatyn 12 ınvestıtsııalyq jobany iske asyrý jáne 1,2 mlrd dollarǵa 2,1 mln tonna aýyl sharýashylyǵy ónimderin, onyń ishinde kartop, kókónis, et jáne et ónimderin jetkizýdi uıymdastyrý josparlanyp otyr.
«Eger eki el arasyndaǵy AÓK ónimi boıynsha saýda aınalymynyń statıstıkasyna qarasaq, Qazaqstan men Ózbekstannan jetkizilimder turaqty túrde júzege asyrylyp jatqanyn kóremiz. Biz azyq-túlik qajettilikterin ózara tolyqtyryp otyramyz. Mańyzdy máselelerdiń biri - tarıfterdi, onyń ishinde tranzıttik tarıfterdi tómendetý, saýda jáne tranzıt rásimderin ońaılatý, bir-birine qatysty ashyq saýda saıasatyn qoldaný arqyly taýar aınalymyn ulǵaıtý úshin qolaıly jaǵdaılar jasaý bolyp tabylady», - dedi Erbol Qarashókeev eki el Prezıdentteriniń kezdesýi kezinde.
Aıta keteıik, Qazaqstan men Ózbekstan arasyndaǵy aýyl sharýashylyǵy taýarlary aınalymy oń kórsetkishterdi kórsetip otyr, máselen bıylǵy 10 aıda 31%-ǵa ósip, 1,4 mlrd dollardan asty. Qazaqstannan eksporttyń kólemi 1,165 mlrd dollardan asty. Otandyq aýyl sharýashylyǵy taýaryn óndirýshiler Ózbekstanǵa negizinen bıdaı, kúnbaǵys maıy, un jáne ІQM eti, sondaı-aq makaron ónimderi men kartop satady. Ózbek tarapy Qazaqstanǵa 233,7 mln dollarǵa jemis pen kókónisterdi satty.